Munduko jatetxerik onenen artean, Bittor Arginzoniz sukaldariaren Etxebarri erretegia (Atxondo, Bizkaia) da seigarrena; munduko seigarren onena, eta Euskal Herriko onena. Hala izendatu du, behintzat, Restaurant Magazine aldizkariaren The World's 50 Best Restaurant sailkapen entzutetsuak. Bart gauean ezagutarazi dute zerrenda, Londresen eginiko ekitaldi batean, eta Etxebarri erretegiaz gain, zerrenda horretan sailkatu dituzte Aitor Arregiren Elkano jatetxea eta Andoni Luis Adurizen Mugaritz jatetxea ere.
Aurreikuspenen arabera, munduko jatetxerik onena bilakatzeko hautagai nagusietako bat zen Bittor Arginzoniz sukaldariaren Etxebarri erretegia, baina, azkenean, seigarren lekuan gelditu da. Hiru postu jaitsi da, beraz: iaz ezagutarazi zen The World's 50 Best Restaurant sailkapenean hirugarren lekuan gelditu zen.
Aurten, Danimarkako Geranium jatetxeak jaso du munduko jatetxerik onenaren aitortza. Danimarkako hiriburuan dago, Kopenhage hirian, eta eskaintza gastronomiko guztiz begetala du. Haren atzetik sailkatu dira, hurrenez hurren, Limako Central (Peru), Bartzelonako Disfrutar (Katalunia), Madrilgo DiverXO (Espainia) eta Mexiko Hiriko Pujol (Mexiko) jatetxeak.
Elkano eta Mugaritz, 16. eta 21. lekuan
Aitor Arregiren Elkano eta Andoni Luis Adurizen Mugaritz jatetxeak ere goratu dituzte zerrenda entzutetsuan. Getariako (Gipuzkoa) Elkano 16. lekuan sailkatu da, joan den aldiko postu berean. Errenteriako (Gipuzkoa) Mugaritz, berriz, 21. lekuan sailkatu da. Iazko zerrendarekin alderatuta, zenbait postu galdu ditu; izan ere, aldi hartan 14. lekuan sailkatu zen.
HOT OFF THE PRESSES: The World’s 50 Best Restaurants 2022, sponsored by S.Pellegrino & Acqua Panna. #Worlds50Best@SanPellegrinopic.twitter.com/VbyqmAK4kZ
— The World's 50 Best (@TheWorlds50Best) July 18, 2022