Aspeko haraneko Akoze (Acus-Accous, Okzitania) herriko bazter batean leherkariz beteriko bost bidoi topatu dituzte. Prokuradorearen arabera, ETAren biltegi zahar bat izatea da litekeena.
Adierazi dutenez, nekazari batek bost bidoi topatu zituen atzo, harresi baten barruan, Aoulet deituriko lekuko aparkaleku batean. Herriko alkate Dany Barraudek esan duenez, plastiko urdina ikusi du nekazariak harri bat mugitu duenean. Hainbat bidoi atera ditu, eta barruan begiratu duenean, hauts zuri bat sumatu du.
Parisek Paben duen prokuradore Cecile Gensacek adierazi duenez, «litekeena da ETAren zulo zahar izatea». Izan ere, alkateak esan du bidoietan amonio nitratoa zegoen idatzita. euskaraz, eta pisua.
Leherkariez arduratzen diren teknikariek gaur goizean jaso dituzte gaiok. Herritar batzuek leherketak entzun dituztela zabaldu du Sud Ouest egunkariak. Fiskalak gaineratu du «gai zaharrak» zirela, eta kontuz maneiatu behar izan dituztela, eraman aurretik.
Zakur taldeekin aritu dira inguruan, baina ez dute beste biltegirik topatu.
