Irlandako errugbi federazioak debekatu egin die emakume transei emakumezkoen taldeetan jokatzea
Federazioaren esanetan, emakume transek «abantailak» dituzte «indarrari, energiari eta gaitasun fisikoari dagokienez». Dublingo The Emerald Warriors LGTBI errugbi taldeak salatu du hartutako neurria «atzerakoia» dela, eta federazioari eskatu dio erabakia atzera botatzeko.
Irlandako LGTBI komunitateak gogor kritikatu du IRFU errugbi federazioak emakume transgeneroei emakumezkoen taldeetan jokatzeko debekua ezartzea erabaki izana. Dublingo The Emerald Warriors LGTBI errugbi taldeak salatu du neurria «atzerakoia» dela, eta IRFUri eskatu dio erabakia atzera botatzeko. Taldearen ustetan, politika horrek «are gehiago» murriztuko ditu transgeneroak «seguru» sentituko diren guneak, eta, azpimarratu duenez, «errugbiari, kirolari eta gizarteari» eragiten dien gai bat da. Gaineratu du erabakia ez datorrela bat «kirolaren balioekin».
IRFUk atzo eman zuen erabakiaren berri, eta onartu zuen gaia «delikatua eta zaila» dela. Alabaina, nabarmendu zuen neurria «beharrezkoa» dela, eta argudiatu emakume transek «abantailak» dituztela «indarrari, energiari eta gaitasun fisikoari dagokienez». Era berean, federazioak zehaztu du gizon transgeneroek gizonezkoen taldeetan jokatzen jarraitu ahal izango dutela «idatzizko baimena ematen badute eta arriskuen ebaluazioa egiten bada».
Aaron Doyle The Emerald Warriors egunkariko inskripzio arduradunak News Talk irratian jakinarazi duenez, IRFUrekin «lanean jarraitu» nahi dute gai hori lantzeko. Espero dute datozen hilabeteetan «plan bateratu bat» egin ahal izatea. Haren ustez, federazioak bertan behera utzi beharko luke erabaki hori, eta «kasu bakoitza banaka» aztertu, lehendik ezarrita zeuden irizpideak aintzat hartuta.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
