Bilboko Aste Nagusia hasi zenetik bi egun baino pasatu ez diren arren, dagoeneko zazpi ziztada kasu ikertzen ari dira. Horietako bost atzo jakinarazi zituzten, eta gaur beste biren berri eman dute. Gainera, beste emakume batek salatu du asteburuan Atharratzeko festetan (Zuberoa) ziztatu egin dutela.
Bilboko kasuei dagokienez, atzo bost emakumek esan zuten ziztatu egin zituztela, eta horietako hiruk behintzat salaketa jarri dute dagoeneko; gaur, berriz, Bilboko Areatzan izandako beste bi ziztadaren berri eman dute. Ertzaintzak eta Bilboko Udaltzaingoak ikerketak zabaldu dituzte.
Bilboko kasuez gain, Atharratzeko festetan ere egon da salaketa bat ziztadagatik. Biktima gaizki sentitzen zen, eta ospitaleko larrialdietara eraman behar izan zuten.