Amaitu da itxaronaldia: Egunean Behin jokoa martxan izango da berriro ere irailaren 26tik aurrera. Hamargarren denboraldia izango da, eta «berriztuta eta itxuraldatuta» itzuliko dela adierazi du CodeSyntaxek, «atseden pixka bat luzexeagoa» egin ondoren.
Iraila iritsi da, eta irailarekin berpiztuko da Egunean Behin. Irailaren 26an jokoa itzuliko da... sorpresa parearekin! pic.twitter.com/dYAiewN9yh
— Egunean Behin (@eguneanbehin) September 1, 2022
Apirilaren 10ean amaitu zuten bederatzigarren denboraldia, eta 60.000 lagunek baino gehiagok parte hartu zuten asteroko testetan. Gainera, hiru aldiz, finala telebistan jokatu zuten, zuzenean, eta Korrikaren amaierako festan ere partida bat antolatu zuten.
Maiatzean prest zeuden hamargarren denboraldiari ekiteko, orduan ateratako oharrean azaldu zutenez, baina nahiago izan dute atsedena apur bat luzatu, eta aplikazioari berrikuntza batzuk egin ondoren lehiaketa «berpiztu».
Berbaxerka, BERRIAn
Egunean Behin-ekin batera, Berbaxerka da azken urteetan sortu diren jokoetariko bat. BERRIAren webgunean dago bertan jokatzeko aukera: Berria.eus/berbaxerka helbidean. Ausazko zazpi hizkirekin hitzak topatzea da erronka. 2022ko urtarrilaren hasieran euskarara ekarri zuten Marc Font informatikariak eta Gorka Salces irakasleak.