Santorini uhartean (Grezia) larri zauritu zuten Beasaingo (Gipuzkoa) bizilaguna ZIU zainketa intentsiboetako unitatetik atera da. Abuztuaren 11n, lagunekin oporretan zegoela, eraso egin zioten hainbat lagunek, lapurreta egiteko; bakarrik zegoen eraso ziotenean. Atenasen ospitaleratu zuten, oso larri.
Gazteak hogei egun inguru egin ditu zainketa intentsiboetako unitatean, baina, Leire Artola Beasaingo alkateak EITBri adierazi dionez, haren egoerak hobera egin du; asteartean atera zuten zainketa intentsiboetako unitatetik. Halere, ez dute jakinarazi noiz itzuli ahal izango den Euskal Herrira.
Poliziak 16 eta 19 urte arteko lau lagun atxilotu zituen erasoarekin lotuta, hotel batean. Greziako hainbat hedabidek zabaldu zutenez, kamera batzuek grabatutako irudiei esker identifikatu zituzten. 500 euro eta hiru telefono atzeman zizkien Poliziak.
