Reala 3-1 Alaves
Realak irabazi du Euskal Herria Kopa
Berdinduta amaitu dute lehen zatia (1-1), baina bigarren zatian nagusi izan da Reala; Jensenek bi gol sartu ditu, Maddi Torrek bat, eta Vilesek beste bat. Armengolen izan da Alavesen gola.
Faboritoa gailendu da Euskal Herria Kopan: Reala. Laugarren txapela da txuri-urdinentzat. Azkoitian (Gipuzkoa) jokatu du finala Alavesen aurka. Berdindua izan da lehen zatia, baina, azkenean, nagusitasunez nagusitu dira gipuzkoarrak. 2012an, 2019an, 2020an eta 2022an lortu du garaikurra.
Jensenek ireki du markagailua 13. minutuan, baina azkar berdindu du Armengolek: 16. minutuan sartu du babazorroen gola. Bigarren zatian, Jensenek, Maddi Torrek eta Vilesek sartu dituzte Realaren golak. Jenseni eman diote neurketako jokalari onenaren saria.
Bi taldeentzat denboraldiaurreko azken partida izan da, datorren asteburuan ekingo baitiote ligari; gipuzkoarrek Atletico Madrilen aurka, eta arabarrek Levanteren kontra.
Arroyoren taldea denboraldi ikusgarria egitetik dator, eta Txapeldunen Liga jokatuko du. Berriro ere goiko postuetan egotea izango dute helburu sasoi honetan. Lehen Mailara igo ostean, berriz, oso denboraldi txukuna egin zuen Arabako taldeak, eta uste baino gutxiago sufrituta lortu zuen salbazioa. Gorengo mailan egonkortzea izango dute xede orain.
Euskal Herria Kirola elkarteak antolatzen du txapelketa, eta horren ordezkari Kike Zurutuzak iritzi ona du aurtengo aldiaz: «Giro oso onean gauzatzen ari da, eta bi mailak oso ondo joan dira. B mailan ligaxka formatua estreinatu dugu, eta ongi funtzionatu du». Zurutuzak azpimarratu du Euskal Herria Kirolaren asmoa dela hurrengo aldietan behetik gorako lehiaketa jokatzea. Horretarako, «dauden aukera guztiak» aztertuko dituzte parte hartzen duten klubekin.
Atzo jokatu zen hirugarren eta laugarren postua, eta Athleticek 2-0 irabazi zion Eibarri, Nerea Nevadoren eta Jone Amezgaren golei esker irabazi ere.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
