Futbola
Luis Mari Elustondo Euskadiko Federazioko presidente ohia hil da
75 urte zituen, eta iazko martxoan utzi zuen kargua. UEFAn eta FIFAn selekzioaren ofizialtasunaren eskaria bideratu zuen, nahiz eta ondoren bi erakundeek atzera bota zuten.
Euskadiko Futbol Federazioak jakitera eman duenez Luis Mari Elustondo zendu da, erakundeko presidente ohia. Erandion (Bizkaia) jaioa, bederatzi urte izan zen presidente: 2012tik 2021ra. Selekzioaren ofizialtasunaren eskaria UEFAren eta FIFAren aurrean bideratu zuen presidentea izan zen, nahiz eta eta gero atzera bota zuten. Iazko martxoan hartu zuen haren lekua Javier Landetak. 75 urterekin zendu da Elustondo.
Euskadiko Futbol Federazioak FIFAri eta UEFAri eskubide osoko kide moduan onartua izatea eskatzea erabaki zuen 2018ko abenduaren 13an, 44 bozetatik 43 aldekoak izan ziren bileran. «Baiezkoak irabaztea espero
nuen, baina ez hain modu garbian. Federazioko kideek argi utzi dute eskaera egin nahi diotela UEFAri eta FIFAri», adierazi zuen batzarraren amaieran Elustondok. Handik bi urtera bete zuen agindua., Eusko Jaurlaritzarekin batera. Hori egiten aritu ziren Elustondo bera, eta Jon Redondo Eusko Jaurlaritzako Jarduera Fisikoaren eta Kirolaren zuzendaria. Eskariak "bideragarritasun legala" zuela berretsi zuten aurkeztutako agirian, eta "alde guztiekin adostutako integrazioa gauzatzeko borondatearekin" eginda zegoela.
Elustondo beti agertu zen bide horren alde. Ofizialtasunarena "mantso, akordioekin eta armonia onean" egin beharreko zerbait dela zioen. "Lortuz gero euskal zaleen pozerako izango da". Baina argi esan zuen. "Gu ez gara sekula pankarta eta oihu batekin aterako". Kargua uzterakoan hurrengo zuzendaritzak egin beharko lana izango zela berretsi zuen. Baina UEFAk eta FIFAk atzera bota zuten eskaria iazko udan.
Selekzioaren izendapenaren arira jokalariekin izandako desadostasunen ostean, Elustondo presidente zela partidak berreskuratu ziren, eta FIFA datetan jokatu zen horietako bat. Gizonezkoen selekzioaren azken partida Costa Ricaren aurka izan zen, Eibarren jokatu zen, 2020ko azaroan, eta Elustondo oraindik presidente zen. Emakumezkoenak iaz jokatu zuen hiruko torneo bat Venezuelaren eta Argentinaren kontra, eta irabazi egin zuen.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
