Albistea entzun

Enpresak

Eroskik 46,8 milioi euroren irabaziak izan ditu lehen seihilekoan

Inflazio handiaren agertokian, «familiei laguntzeko ahalegina» egin duela esan du kooperatibak. Salmentak 2.633 milioi eurora iritsi dira

Elorrioko kooperatiba baten hipermerkatu bat.
Elorrioko kooperatiba baten hipermerkatu bat. EROSKI Tamaina handiagoan ikusi

Xabier Martin -

2022ko irailak 30

Eroskik emaitza positiboekin jarraitzen du. Ez pandemiaren aroak izan duen abiadura handian, mozkinak %11 apaldu baitzaizkio urteko lehen erdian, baina pandemia aurreko azken urtean, 2019an, urte osoan irabazitakoa (45 milioi euro) baino gehiago irabazi du aurtengo lehen erdian: 46,8 milioi. Datu horrek Elorrioko banaketa talde handiak hartu duen norabide egokia argi eta garbi islatzen du, orain ez hainbeste zorrak ekarri zuen mamua aldenduz.

Elorrioko banaketa kooperatibak azaldu du «marjinak murrizteko ahalegina» egin duela, «kostuak handitu egin direnez eta inflazioak prezioetan dituen ondorioei eusteko», eta horrek etekina mugatu duela hein batean. Enpresak esan du «neurri handian finantza kostuak murriztu izanak» bultzatu duela irabazia, «zorraren kopurua txikiagoa izan delako eta ezohiko eraginak apalagoak».

Gauzak horrela, 2.633 milioi euroko negozioa erdietsi du taldeak ekitaldiko lehen erdian. %10etik gorako inflazioaren agertokian, salmentak lau puntu handitu direla azaldu du Eroskik. Emaitza horren atzean, batetik, taldeak egindako sustapen ahalegina dagoela uste du; hau da, egungo inflazio egoera dela eta, «kontsumitzaileei aurreztea errazteko ahalegina» egin duela. Bestetik, «familien kontsumo joeraren ondorioa» legoke salmenten hazkunde apalagoan, «erosketa merkeagoak egiten ahalegintzen baitira».

Ekoizle txikiak

Eroskik uste du, hortaz, prezioen gorakada «geldiarazi» egin duela, eta, aldi berean, sustapen jarduera handitu duela, «dela deskontuen bidez, dela eskaintzen bidez». Familien alde egindako ahalegin horri kopuru bat jarri dio banaketa enpresak: 183,6 milioiren aurreztea urteko lehen erdian. Ahalegin horrekin batera, gastuak handitu zaizkio Eroskiri, ohar batean jakinarazi duenez; «argindarra, garraioa eta alokairua», zehaztu du. Horren ondorioz, %11 jaitsi da etekin operatibo arrunta.

«Ahalegin handia egiten ari gara prezioen inflazioaren ondorioei eusteko. Marjinak apaltzen ari gara, kontsumitzaileak ez dezan jasan kostuen igoera. Familien aurrezkietan inflazioaren ondorioak txikitzen saiatzen ari gara», esplikatu du Eroskiko presidente Rosa Carabelek. Elikadura arloko negozio marjina «asko apaldu» dela gaineratu du, ekoizleek prezioetan helarazten omen dizkietelako kostuen igoerak.

«Aurrezte programa sendo bat jarri dugu martxan, egoera arinagoa izaten laguntzeko», nabarmendu du Carabelek. Salmenta prezioekin, «muturreko» sustapenekin eta fidelizazio klubarekin egin dute programa hori. Agustin Markaideren lekukoa hartu berri duen presidenteak azaldu du tokiko ekoizleei «laguntza eta babesa» eman diela, inflazioak eta haren eratorriek ekoizle txikiak «gehiago» jo dituelako. «Ohartzen gara jasaten ari garen zailtasunez janariaren katebegi guztietan», ziurtatu du Carabelek: «Gure helburua da egoera ahalik eta ondoena kudeatzea, arduraz jokatuz».

Iberiako Penintsulako iparraldeko liderretako bat da Eroski banaketaren negozioan, Hego Euskal Herrian, Galizian, Katalunian eta Balear Uharteetan; merkatu horietan %12tik gorako kuota dauka, eta Hegoaldean lehen taldea da. 1.646 saltokiko sare komertziala du: supermerkatuak, hipermerkatuak eta cash & carry-ak, online supermerkatuaz gain. Gasolindegiak, bidaia bulegoak eta kirol ekipamendurako dendak ere baditu taldeak. Azken urteetan desinbertsio handiak egin ditu zorraren zama handiari aurre egiteko eta bankuekin berregituraketa planak adostu ondoren. Taldeak sei milioitik gora bezero bazkide ditu, eta 33.000 bazkide kooperatibista, langile eta frankizia hartzaile baino gehiago.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Pentsiodunen mobilizazio bat, Bilbon, iaz. / ©Aritz Loiola, Foku

Pentsioak %8,5 handituko dira urtarrilean Hego Euskal Herrian

Iker Aranburu

Iaz ez bezala, aurten batez besteko pentsioa urte amaierakoa baino handiagoa izango da. Batez besteko pentsioa 115 euro handituko da urtarrilaren 1ean.

Bizkaiko metalgintzako lehen greba eguna, atzo, Trapagaranen. ©Marisol Ramirez / FOKU

Langile gehienek babestu dute metalgintzako bigarren greba eguna

Iñaut Matauko Rada

ELAk adierazi du grebaren atzoko eta gaurko erantzuna oso antzekoak izaten direla Bizkaiko metalgintzan. CCOO, LAB eta UGTren arabera, %85eko erantzuna izan du gaurko greba deialdiak.

Iñaki Zabaleta, Saioa Urriz eta Imanol Pascual, atzo. ©ELA SINDIKATUA

ELAk salatu du Nafarroako aurrekontuak «legealdiko okerrenak» izango direla

Joxerra Senar

Europako funtsak kenduta, 2023ko aurrekontuak %1,6 baizik ez dira igoko, BPGaren eta KPIaren «oso azpitik». EH Bilduk aurrekontuak «apaindu» izana kritikatu du

<b>Trapagarango Amazoneko langileak greban, atzo, biltegiaren sarreran.</b> ©MARISOL RAMIREZ / FOKU

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.