Kontratua sinatu zuen, baita hura eten ere. Gorabeheratsua izan da Twitter sare sozialaren erosketa Elon Musken partetik —munduko pertsonarik aberatsena da, eta Tesla enpresaren sortzaile eta buru—. Uztaileko erabakiaz damutu da Musk, eta Twitter erosteko asmoa erakutsi du berriro, Bloomerg atari digitalak jakinarazi duenez.
Eta lehenbizikoan eskainitakoa pagatuz erosi nahi du: akzio bakoitzeko 54,20 dolar. Hau da, Twitter 44.000 milioi dolarren truke eskuratu asmo du (39.803 milioi dolar, hain zuzen). Eskaintzaz berri izan bezain laster, Twitterren akzioek %18 egin dute gora.
Apirilaren hasieran, Twitterren akzioen %9 erosiak zituen Muskek. Hilabetea amaitu aurretik, sare soziala bere esku zuen, 44.000 milioi dolarren truke (39.803 milioi euro). Uztailean atzera egin zuen, argudiaturik Twitter ez zela betetzen ari kontratuan jasotako baldintzak. Hainbat aldiz eskatu zion Teslaren buruak sare sozialeko kontu faltsuen informazioa, baita horiek zenbatzea eta bertan behera uzteko modua topatzea ere. Garesti atera zitzaion erosketa ez egitea: kontratuan jasota zegoen 987 milioi euro ordaindu behar zirela bi aldeetako batek kontratua bertan behera utziz gero.