Elon Musk Teslaren sortzaile eta kontseilari ordezkariak Twitterri jakinarazi dio bertan behera utzi duela sare sozial hori erosteko bi aldeek sinatu zuten kontratua. Muskek argudiatu du Twitter ez dela betetzen ari hor jasotako baldintzak. Publiko egin duen gutun batean dio hainbat alditan eskatu diola Twitterri kontu faltsuen inguruko informazioa eta horiek zenbatu eta bertan behera uzteko moduaz.
Twitterrek erantzun dio jada, eta esan du salatu egingo duela erosketa kontratu hori bertan behera utzi izana. 42.156 milioi eurotan adostu zuen Twitterren erosketa bi aldeek kontratu horretan, baina kontu faltsuak %5 baino gutxiago direlakoan. 2019an 330 milioi erabiltzaile zituen Twitterren, eta aurten urte hasieran adierazi zutenez, 229 milioi erabiltzailerekin dirua irabazteko aukera eman dezake.
The Twitter Board is committed to closing the transaction on the price and terms agreed upon with Mr. Musk and plans to pursue legal action to enforce the merger agreement. We are confident we will prevail in the Delaware Court of Chancery.
— Bret Taylor (@btaylor) July 8, 2022
Muskek asteak zeramatzan kontu faltsuen inguruko Twitterren politika auzitan jartzen, eta horrek sare soziala kudeatzen duen izen bereko enpresaren akzioak erorarazi egin ditu. Bart gaueko iragarpenaren ostean, CNN telebista katearen arabera, %6 erori dira akzioak, burtsa itxi baino lehen. Twitterren salaketa Delawareko Kantzilertza Auzitegiak aztertuko du. Erosketa kontratuan jasota dagoenez, bi aldeetako batek kontratua bertan behera utziz gero, 987 milioi euro ordaindu beharko dizkio besteari.
