Beheranzko joerarekin jarraitzen dute langabezia datuek Hego Euskal Herrian, gutxinaka bada ere. INE Espainiako Estatika Institutuaren datuen arabera, 2021. urtearen amaieratik 2022aren hasierara igoera itxiki bat egon bazen ere, 2022ko bigarren eta hirugarren hiruhilekoetan behera egin du langabezia tasak. Urte hasieran, %9,1 zen datua; apiriletik ekainera, %8,8; eta uztailetik irailera, %8,5. 115.600 langabe daude Hego Euskal Herrian, 2.200 gutxiago. Pertsona aktiboen eta landunen kopuruek ere gora egin dute, 22.900 gora lehen kasuan, eta 24.900 gora bigarrenean.
Sexuka, emakumezkoen langabezia tasa gizonezkoena baino handiagoa da oraindik ere. Irailaren amaieran 58.000 emakume langabe zenbatu zituzten —%8,9ko tasa—, eta 57.600 gizon langabe —%8ko langabezia tasa—.
Lan sektoreari begiratuz gero, zerbitzuetan lan egiten dutenak dira gehienak. Landunen %71,1k jarduten dute zerbitzuetan, eta %21,8k industrian. Eraikuntzako langileak landunen %5,6 dira, eta %1,5, berriz, lehen sektorekoak.
Hala ere, herrialdeka ez da parekoa izan langabeziaren beherakada bigarren hiruhilekotik hirugarrenera. Izan ere, Araban eta Gipuzkoan behera egin du, baina Bizkaian eta Nafarroan gora egin du langabeziak. Araban %9,4tik %8,6ra jaitsi da, eta Gipuzkoan, berriz, %7,6tik %6ra, 0,8 eta 1,6 puntuko jaitsierak. Bizkaian 0,3 puntu igo da langabeen ehunekoa, %9,3tik %9,6ra, eta Nafarroan, berriz, portzentaje horrek %8,8tik %9ra egin du gora, 0,2 puntu.
Urte artean, 137.400 langabe zeuden 2021eko iraileko neurketan, aurten baino 21.800 gutxiago. Tasa %10,1 zen orduan, aurten baino 1,6 puntu gutxiago. 7.100 pertsona gehiago daude aktibo, eta landunak, berriz, 28.800 gehiago dira orain.
Pandemia aurreko datuen pare
COVID-19aren pandemiak kaleratze masiboak eta jarduera ekonomikoaren beherakada ekarri zituen, eta langabezia tasak gora egin zuen etengabe urte oso batez. 2020ko lehen hiruhilekoaren amaieran etorri zen itxialdia, eta martxoaren amaieran %8,7 zen langabezia tasa. 2019aren bigarren erdian tasa igo ostean, 0,4 puntu egin zuen behera 2020aren hasieran. Ondoren, apiriletik ekainera, 0,6 puntu egin zuen gora langabeen ehunekoak, %9,3ra igoz, eta hurrengo hiruhilekoan ia puntu bat handitu zen, %10,2raino. 2020ko azken hiruhilekoan %10,3ra igo zen, 0,1 puntu gehiago soilik, baina 2021. urtearen hasieran berriro egin zuen gora nabarmen, %11,1ra. Hortik aurrera, beheranzko joera hartu zuen berriro langabezia tasak, gorabeherekin betiere.
Hala, lan merkatua suspertu egin da pandemiak eragindako ezinegonetik, eta itxialdiaren aurreko datuak hobetu ditu langabezia tasak, %8,7 baitzen 2020 hasieran, eta %8,5 orain.
