Joan den astean GuraSOS taldeak jakinarazi zuenez, GHK Gipuzkoako Hondakinen Kontsortzioak baimena eskatu dio Uraren Euskal Agentziari Zubietako erraustegitik Arkaitzerrekara isurtzen diren urak ponpatu eta saneamendu sistemarekin konektatzeko, Añarbeko hodi biltzailearen bidez. GuraSOSek GHKren asmoak salatu zituen, eta esan zuen ponpaketa sistema hori eraikitzeko 369.087, 50 euroko aurrekontua izango duela, eta bi hilabeteko epean egitea espero dela. Plataformak azaldu zuen ponpatutako ur hori Monpaseko hustubidetik irtengo litzakeela, Donostiako Zurriolako hondartzaren ingurura. GHK-k ohar bidez erantzun du, eta esan du Monpaseko hustubidera ura desbideratzeari buruz argitaratutako albistea «faltsua» dela.
Gertatutakoaren beste bertsio bat eman du GHK-k. Haren esanetan, baimena eskatu du instalazioaren azpitik doan sakoneko drainaren irteeran segurtasun sistema bat jartzeko. Azaldu duenez, sistema horretan ponpaketa bat jarriko da, «etorkizunean beharrezkoa izanez gero plantaren azpian biltzen den lurpeko ur emari txikia Añarbeko ur beltzen sarera eramateko».
Kontsortzioaren arabera, «prebentzio eta segurtasun jarduera hutsa» da, eta gaur egun ez da beharrezkoa. Eta helburua da, haien hitzetan, instalazioen segurtasuna are gehiago areagotzea. Gainera, ziurtatu dute informazio guztia Gipuzkoako Hondakinen Kontsortzioko Batzarretan jakinarazi dutela.
