Albistea entzun

Qatarko Munduko Kopa

Frantzia eta Ingalaterra, final-laurdenetara

Mbapperen bi golekin, Frantzia nagusitasunez gailendu zaio Poloniari (3-1). Ingalaterrak ere aise hartu du mendean Senegal (3-0).

Kilian Mbappe, gaur sartu duen bi goletako bat ospatzen.
Kilian Mbappe, gaur sartu duen bi goletako bat ospatzen. Georgi Licovski / EFE Tamaina handiagoan ikusi

Paulo Ostolaza -

2022ko abenduak 4

Aurrera egin dute eguneko bi faboritoek. Oraingoz, ez da ezustekorik izan Qatarko Munduko Kopako final-zortzirenetan: Herbehereek, Argentinak, Frantziak eta Ingalaterrak egin dute aurrera. Azken biek nagusitasunez irabazi diete gaur Poloniari (3-1) eta Senegali, eta elkarren aurka arituko dira.

Frantzia 3-1 Polonia

Gaitasun ikaragarria du Frantziako selekzioak. Beldurra sortzeko moduko jokalariak ditu aurrealdean, eta beste behin erakutsi du hori gaur. Ez da alferrik egungo txapelduna. Didier Deschampsen mutilek Munduko Kopatik kanpo utzi dute Robert Lewandowskiren Polonia (3-1), Olivier Girouden gol bati eta Kilian Mbapperen biri esker, eta Ingalaterraren edo Senegalen aurka jokatuko dute final-laurdenetan.

Gaurko golari esker, Giroud Frantziako selekzioko golegile historiko onena bihurtu da, 52 golekin. Thierry Henry bera gainditu du (51); ez da ahuntzaren gauerdiko eztula. Etorkizunean, ordea, litekeena da Mbappek marka horiek haustea: PSGkoak bost gol daramatza Qatarko Munduko Kopan, eta txapelketako golegile nagusia da. Selekzioarekin 24 gol sartu ditu, 24 urte betetzear dela.

Norgehiagokari dagokionez, Frantzia lehen minututik hasi da nagusitasuna erakusten. Atzean sartu da Polonia, nahiz eta baloia ez zuenean goian presionatu dituen urdinak. Baloiarekin, ordea, ezer gutxi egiten zuten poloniarrek. Lan mordoa izan du Szczesny atezainak; besteak beste, Dembeleren eta Tchouameniren jaurtiketei erantzuteko.

Minutuak aurrera egin ahala, ordea, berdindu egin da partida; Lewandowskik eman du lehen abisua area kanpotik, eta, 37. minutuan, Poloniak izan du lehen zatiko aukerarik argiena: Zielinskik indartsu errematatu penalti puntutik, baina ondo erantzun dio Llorisek, eta bigarren errematea Frantziako defentsak atera du atepetik.

Oraindik sustoa gainditu gabe zutenean, Giroud izan da barkatu ez duena: Mbapperen pase eder bat baliatu du baloia sareetara bidaltzeko. Atsedenaldia heltzear zen, eta Milaneko aurrelariaren golak hotz utzi ditu poloniarrak.

Bigarren zatian, atzerapauso bat egin du Frantziak, horrela, kontraerasoak baliatzen saiatzeko. Eta ondo irten zaio jokaldia: Mbappek bi aldiz birrindu du Szczesnyren ateko sarea, bi jaurtiketa gogoangarrirekin, 74. eta 91. minutuetan. Lewandowskik azken minutuan sartu du, penaltiz, ohorearen gola. Aurkariaren zain geratu da txapelduna.

Ingalaterra 3-0 Senegal

Antzeko gidoia izan du eguneko bigarren partidak. Senegalek lehen zati ederra jokatu du, baina azken minutuetan duten kalitatea erakutsi dute Ingalaterrako jokalariek, eta neurketa erabakita utzi duten bi gol sartu dituzte atsedenaldiaren aurretik. Jokaldi azkarretan elkarrekin konbinatzeko sekulako gaitasuna dute Gareth Southgaten mutilek.

Aurretik, ordea, larri ibili dira ingelesak. Eurek izan dute baloiaren jabetza, baina, kontraerasoei eta presioari esker, Senegal izan da arrisku gehien sortu duen taldea. 23. minutuan, Diak aukera bikaina izan du area barruan; Stonesek eskuarekin desbideratu du baloia, baina epaileari ez zaio penaltia adierazteko modukoa iruditu. 31.ean, berriz, Sarrek erremate indartsua egin du, baina esku bikaina atera du Pickfordek baloia desbideratzeko. Suarekin jolasten ari zen Ingalaterra.

Kalitatea, ordea, soberan dute three lions-ek. Harry Kanek baloi bat jaso du, Bellinghami utzi dio, hark jokaldia egin du hegaletik, eta Hendersoni pasatu dio, Liverpooleko jokalariak baloia sareetara bidaltzeko. Gol bikaina. 46. minutuan, beste maisulan bat: kontraeraso bat zoragarri jokatu dute Bellighamek eta Fodenek, eta bakarrik utzi dute Kane Mendyren parean. Tottenhameko killer-ak ez du barkatu, eta bere lehen gola sartu du Munduko Kopan.

Bigarren zatia hasi eta gutxira, neurketa erabakita utzi du Sakak, Fodenen jokaldi bikain bat baliatuta. 58. minutua zen. Hortik amaierara arte, kontatzeko ezer gutxi izan du partidak. Ingelesek aurkari puska izango dute parean final-laurdenetan: itxura bikaina ematen ari den Mbapperen Frantzia, egungo txapelduna.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©IÑIGO URIZ / FOKU

«Oso garai politean bizi naiz orain; gozatzen ari naiz»

Julen Etxeberria

Hirugarrenez jarraian ordezkatuko du Mariezkurrena, eta hirugarrenez irabazi nahi du Peñarekin. Haren ustez, enpresari erakutsi dio «kontuan hartu» behar dutela.
Joseba Ezkurdia, pilota jotzen, azkeneko partidan. ©ARITZ LOIOLA / FOKU

Ezkurdia-Martija eta Jaka-Aranguren aukerarik gabe gera daitezke asteburuan

J. Etxeberria

Aspekoek hiru garaipenera dute kanporaketa, eta Baikokoek, laura. Nafarrek gaur jokatuko dute, Urrutikoetxea-Albisuren aurka, Zornotzan
Mathieu van der Poel eta Wout van Aert, lehian, Benidormen jokatutako Munduko Kopako proban. ©MORELL / EFE

Betiko biak, eta beste guztiak

Eñaut Agirrebengoa

Gaurtik igandera jokatuko da ziklo-kroseko Munduko Txapelketa, Hoogerheiden (Herbehereak). Gizonezkoen proban, Van der Poelen eta Van Aerten arteko beste borroka handi bat espero da. Iazko txapelduna, Pidcock, ez da lehiatuko.
 ©JAGOBA MANTEROLA / FOKU

«Gozatzen dudalako jokatu izan dut beti, ez markak ezartzeko»

Beñat Mujika Telleria

Maria Españak urte asko daramatza Espainiako ligarik onenetan aritzen, eta kirol heldutasun betean dago. Bikain ari da denboraldi honetan. Kantxan erakusten duen lidergo bera erakusten du handik kanpo ere.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.