Albistea entzun

Futbola

Euskal selekzioak partida bat jokatuko du abenduaren 20an, Txileren aurka

Mendizorrotzan jokatuko da partida, 19:00etan, eta Juanjo Arregi izango da selekzioaren hautatzaile berria. Irene Paredes, Maite Oroz, Nahikari Garcia eta Damaris Egurrola ezingo dira bertan egon, euren taldeekin Txapeldunen Ligako partidak dituztelako.

Euskal selekzioak partida bat jokatuko du abenduaren 20an, Txileren aurka
Euskal selekzioak partida bat jokatuko du abenduaren 20an, Txileren aurka Tamaina handiagoan ikusi

Ainara Arratibel Gascon -

2022ko abenduak 7 15:24

Euskal selekzioak izango du partida Gabonetan. Txileren aurka jokatuko du. Mendizorrotzan. Abenduaren 20an izango da, 19:00etan. Aulkian aldaketa izango da. Izan ere, orain arteko hautatzaile Iñigo Juaristiren ordez, Juanjo Arregi arituko da taldea zuzentzen. Juaristik Alaveseko entrenatzaile kargua hartu zuen duela aste batzuk, eta horregatik izan da aldaketa. "Ilusio handia dugu partida honekin, eta euskal gizarteak ere hala izatea espero dugu", adierazi du Javier Landeta presidenteak. Eta hau erantsi du: "Beti esan izan dugu hiru baldintza bete behar direla euskal selekzioaren partida bat antolatzeko: Lehen Mailako zelai batean jokatzea, selekzio handi baten aurka izatea eta jokalari multzo onena bildu ahal izatea. Hirurak betetzen dira kasu honetan".

Euskal selekzioak iazko apirilean jokatu zuen azken neurketa. Basque Country International Football Cup hiruko txapelketan izan zen. Zubietan jokatu zen txapelketa, eta, euskal selekzioarekin batera, Argentinak eta Venezuelak jokatu zuten. Euskal selekzioarentzat izan zen txapela. Venezuelaren aurka 0-0 berdindu ostean, Argentinari 1-0 irabazi zioten, eta garaipen hori erabakigarria izan zen txapelketa lortzeko. Yulema Corres Athleticeko jokalariak sartu zuen gola.

Oraingo honetan, Txileren aurka neurtuko dituzte indarrak. Gora ari den selekzio bat da. Orain arte jokatutako Amerika kopa guztietan izan da, eta bi aldiz izan da txapeldunorde: 1991n eta 2018an. Aurten jokatutakoan, bosgarren postuan amaitu zuen. 2018an bigarren geratu izanak aukera eman zion 2019ko Munduko Kopan parte hartzeko. Estreinakoa izan zuen txapelketan. Ez zuen zorterik izan, multzoen fasean oso aurkari gogorrak izan baitzituen: AEBak, Suedia eta Thailandia. Dena den, lan ona egin zuten. Suediaren kontra 2-0 galdu zuten, eta AEBen kontra, 3-0. Thailandiaren aurka, berriz, 2-0 gailendu zen. Baina ez zen nahikoa izan. Multzoko hirugarren geratu ziren, eta kanporatuak izan ziren. Iazko Tokioko Olinpiar Jokoetan ere parte hartu zuten. Orduan ere, multzoen fasean kanporatu zituzten. Jokatutako hiru partidak galdu zituzten: Ingalaterraren kontra 2-0, Kanadaren kontra 2-1, eta Japoniaren kontra 1-0. Christiane Endler atezaina da haien jokalari ezagunena. PSGn distira egin ostean, egun haren aurkari zuzenean jokatzen du: Lyonen. Bigarren denboraldia du han, eta iaz Txapeldunen Liga eta Frantziako Liga irabazi zituen.

Arregik datozen egunetan emango du deialdia. Baina ziurra da Irene Paredes (Bartzelona), Maite Oroz, Nahikari Garcia (Real Madril) eta Damaris Egurrola (Lyon) ez direla bertan izango. Izan ere, aste horretan Txapeldunen Ligako partidak dituzte euren taldeekin.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JAGOBA MANTEROLA / FOKU

«Gozatzen dudalako jokatu izan dut beti, ez markak ezartzeko»

Beñat Mujika Telleria

Maria Españak urte asko daramatza Espainiako ligarik onenetan aritzen, eta kirol heldutasun betean dago. Bikain ari da denboraldi honetan. Kantxan erakusten duen lidergo bera erakusten du handik kanpo ere.
Iñaki Williams baloiarekin, denboraldi honetan San Mamesen Atletico Madrilen aurka jokatutako partidan. ©ARITZ LOIOLA / FOKU

Hutsune handia utzi du Williamsek

Haritz Gallastegi

Iñaki Williamsek marka ezarri du ligan: 251 partida jokatu ditu. Zelaian ari denean kritikatu egiten dute; ez dagoenean, aldiz, sumatu egiten da haren falta.

Eibarrek eta Alavesek lehen itzulian Ipuruan jokatutako derbiaren jokaldi bat. ©JAIZKI FONTANEDA / FOKU

Biak gora begira daude

Iñigo Lasa Fresneda

Alavesek eta Eibarrek sasoi onean jokatuko dute derbia larunbatean, Mendizorrotzan; bi taldeak goiko postuetan daude. Txema Añibarrok argi du: «Intentsitate eta parekotasun handiko partida izango da».

Osasunaren jarraitzaileak Sevillaren aurkako Kopako partidan. ©Jesús Diges, Efe

Indar Gorriko sei kide atxilotu dituzte Iruñean, borrokaldi batean parte hartu izana egotzita

Berria

Espainiako Poliziak 64 lagun atxilotu ditu guztira, azaroaren 27an Burgos eta Zaragoza taldeen arteko partidaren aurretik Burgosko El Plantio zelaiaren inguruan izandako borrokaldian parte hartzea leporatuta. Tartean daude Indar Gorriko sei jarraitzaile horiek.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.