Tradizioa bihurtu da dagoeneko: Bertsolari Txapelketa Nagusiko finalistak Anoetako futbol zelaiaren erdiguneaz jabetuko dira, futbolarien eta futbolzaleen omenaldia jasotzeko. Larunbatean, Maialen Lujanbiok eta Joanes Illarregik bertso bana kantatuko dute estadioan. Gainera, Lujanbiok —txapelketaren irabazleak— ohorezko sakea egingo du, Realaren eta Osasunaren arteko derbia hasteko. Illarregi txapelketa nagusiko final batean parte hartu duen lehenengo nafarra da.
Realak gaur zabaldu duenez, Amets Arzallus, Aitor Mendiluze, Sustrai Colina, Alaia Martin, Beñat Gaztelumendi eta Nerea Ibarzabal egongo dira zelaian, Lujanbio eta Illarregirekin batera.
Azken egunotan askok gogora ekarri duten irudi bat ekarri zuen tradizioak 2018an. Orduko txapelketa ere irabazi zuen Lujanbiok, eta ohorezko sakea egin zuen, Realaren eta Bartzelonaren arteko partidan. Lionek Messi futbolariak agurtu zuen han, eta bolo-bolo zabaldu zen irudia sare sozialetan. Duela astebete berriz hedatu zen, Messiren Argentinak Futboleko Munduko Kopa irabazi zuelako abenduaren 18an, Lujanbiok Bertsolari Txapelketa Nagusia bereganatu zuen egun berean.
Maialen eta Leo; Lujanbio eta Messi. Eta denak beraiei begira. pic.twitter.com/SsjsXNw62m
— Esti Elduaien Uranga (@Eelduaien) January 14, 2018
