Autoen munduak zertxobait erakartzen bazaitu, ziur ikusi duzula haren bideoren bat. Ken Block (Long Beach, AEBak, 1967- Park City, AEBak, 2023) hil da gaur, azken hamarkadetako auto gidaririk ospetsuenetako bat, elurretako motor batekin izan duen istripu batean. 55 urte zituen. Rallyetan ibilbide luzea egindakoa, ginkanak egiten bilakatu zen ospetsu 2008. urtetik aurrera.
Blockek haietako hamalau egin ditu denera; gehienak, Ford markako autoekin. 2012. urtean argitaratu zuen bosgarrena, eta bideo hark bost milioi bisita baino gehiago izan zituen lehen 24 orduetan; 113 milioi ditu albiste hau idazterako orduan. Beste hainbat ginkanak ere 50 milioi bisita baino gehiago dituzte.
Horretaz gain, Blockek hogei aldiz hartu zuen parte Munduko Rally Txapelketan, nahiz eta ez zituen emaitza deigarriak lortu. DC Shoes arropa markaren sortzaileetako bat ere izan zen 1994. urtean, eta muturreko hainbat kiroletako ekitaldietan ere parte hartu izan zuen.
2021. urtetik Audi markaren pilotua zen, eta duela bi hilabete eskas argitaratu zuen bere azken ginkana, Audi S1 Hoonitron auto elektrikoarekin egindakoa.
