Irutxuloko Hitza-k zabaldutako informazioaren arabera, Miren Mendizabal zendu zen urtarrilaren 5ean, 88 urte zituela. Berez, Hondarribikoa (Gipuzkoa) zen, baina Donostian bizi izan zen urte luzez. Bera izan zen Mari Domingiren rola egin zuen lehenbiziko pertsona, 1993an. Geroztik, bost edo sei aldiz hartu zuen rol hori.
Haurren artean euskara sustatzea helburu, Antiguako Bagera elkarteko kideek sortu zuten Mari Domingiren pertsonaia, 1990eko hamarkadan. Hortik aurrera, Donostiatik Euskal Herriko txoko guztietara zabaldu zen ohitura.
Pertsonaia sortu bezain pronto, rol hori beteko zuen emakume baten bila hasi zen elkartea, eta Mendizabalekin egin zuten topo. «Pozez» hartu zuen aukera, eta 1993an Antiguako Bentaberri plazan agertu zen Mari Domingi. Hurrengo urtean, berriz, desfile bat antolatu zuten Eguberri bezperan.