Ana Ollo Nafarroako Gobernuko Herritarrekiko Harremanetako kontseilariak eta Mikel Arregi Euskarabidea institutuko zuzendari kudeatzaileak bilera izan dute gaur Idurre Eskisabel Euskalgintzaren Kontseiluko idazkari nagusiarekin. Paul Bilbao idazkari nagusi izandakoa ere han egon da. Ollok Eskisabeli esan dionez, Nafarroako Gobernuak elkarlanean aritzeko asmoa du, «euskarak dituen erronkei» erantzuteko. Izan ere, adierazi du eragileen arteko adostasuna dela «hizkuntzaren etorkizuna eraikitzeko tresna». Bat etorri da Eskisabel. Eta Ollok gehitu du erronka bateratu bat dela «herritarren hizkuntza eskubideak» defendatzea.
Euskalgintzaren Kontseiluak 25 urte bete zituen joan den urtean, eta joan den urtean izendatu zuten Eskisabel idazkari nagusi. Bileran, Ollok aukera izan du Kontseiluaren proiektuak hurbiletik ezagutzeko.
«Euskarak Nafarroako gizartearen balioa handitzen du», azpimarratu du Ollok. Eta Herritarrekiko Harremanetako Departamentuaren lan ildoak azaldu ditu: «Hizkuntza Gutxituen Europako Itunak adierazten duen bezala, hizkuntzak babestu eta bultzatzeko betebeharra dugu, erakunde gisa».