Julen Alberdi Txikia IV.a eta Iñaki Azurmendi izan ziren indartsuenak atzo Zestoan (Gipuzkoa), Sherpa Ai binakako aizkolari txapelketan. Bikote txapeldunak 30 minutu eta 7 segundo behar izan zituen seina kana-erdiko, 60 ontzako beste seina eta 72 ontzako bi ebakitzeko.
Minutu eta erdi baino gehiagoren aldea atera zieten bigarren sailkatuei, Eneko Otañori eta Jesus Mari Mujikari. Haiek 31 minutu eta 48 segundoan amaitu zituzten lanak; 8 segundo gehiago behar izan zituzten Mikel Larrañagak eta Arkaitz Jauregik (31:56). Laugarren amaitu zuten Ugaitz Mugertzak eta Julen Larreak (32:22). Lehia estua izan zen hiru bikote horien artean.
Horrela, bigarren urtez jarraian jantzi du txapel hori Txikiak. Txapelketa jokatzen zen bigarren aldia zen aurtengoa. Iaz, Aitzol Atutxarekin irabazi zuen, eta, aurten, Azurmendirekin.
Promozioa
Promozio mailako txapelketa ere jokatu zen atzo Zestoan, hiru bikoteren artean. Haiek lau kana-erdiko eta 60 ontzako beste lau moztu behar zituzten. Horretarako, 15 minutu eta 30 segundo behar izan zituzten garaileek, Julen Kañamaresek eta Julen Otañok. Bigarren amaitu zuten Eneko Saralegik eta Asier Pellejerok (15:44), eta hirugarren Eloy Corcherok eta Aratz Mugertzak (16:02).
