Dozenaka lagun Iruñean, «esklusibotasunaren alde eta osasunaren pribatizazioaren kontra»

«Zirt edo zart egin behar dugu, eta erabaki: herritarren eskubideen eta osasun unibertsalaren alde gaude, ala negozio pribatuen alde?». 200 bat pertsonak osasun sistema publikoaren aldeko elkarretaratzea egin dute gaur Iruñean, Nafarroako Osasun Plataformak deituta. Zehazki, kritikatu egin dute Nafarroako Gobernuaren eta Sindikatu Medikoaren arteko negoziazioetan mahai gainean jarri dela medikuen esklusibotasuna kentzea. Plataformako kideen esanetan, «osasunaren pribatizaziora daraman bidea» da hori: «Herritarrak kezkatuta gaude, Nafarroako Gobernuak interes korporatiboei men egin nahi dielako, horrek ez baititu konponduko osasun sistema publikoak dituen arazo ugariak. Esklusibotasuna kentzea beste bide bat da osasun sistema publikoa pribatizatzeko, hondatzeko eta, baliabide publikoak espoliatuz, etikoak ez diren praktika irregularrak orokortzeko», azaldu du Nafarroako Osasun Publikoko Institutuko kide eta plataformako ordezkari den Iñaki Moreno Sueskunek. Zehazki, sendagileak sare publikoan eta pribatuan nahieran aritzearen ondorioak, luzera, «oso kaltegarriak» izanen liratekeela gaineratu du: «Horrek ekarriko luke herritarrek eskubideak galtzea eta, neurri hori aplikatu duten autonomia erkidegoetan ikusten ari garen bezala, sistema publikoaren kalitatea okertzea. Ondorioetako batzuk dira itxaron zerrendak handitzea eta osasun unibertsalerako sarbidean dauden desorekak eta gizarte arrakalak handitzea».

Nafarroako Osasun Plataformak «zalantzan» jarri du administrazio publikoek izurri garaian txalotutako lankidetza publiko-pribatua: «Osasun Departamentuak sinetsarazi nahi digu, harreman horretan, bi aldeek jasotzen dituztela onurak; gure iritzian, ordea, sistema publikoa parasitatzea da, negozio pribatuei mesede egiteko».

Morenok azaldu du sistema publikoaren gainbehera ez dela oraingoa, eta kritika gogorra egin dio orain Sindikatu Medikoaren aldarrikapenen alde azaldu den UPNri: «Zenbait gobernuk ezarritako murrizketen eragina sumatzen ari gara oraindik. Gobernu horiek bidea itxi zieten profesional berriei, erretiro adinean ziren langileen ordezkatzea zailduz, aurrekontu publikoak blokeatu zituzten eta gure lanbideak prekarizatu. Hortaz, konponbidea ez da etorriko politika horiek sustatu zituztenen aldetik».

Sare publikoa indartze aldera, zenbait neurri proposatu ditu plataformako ordezkariak: «Lantaldea egonkortu behar da, paziente bakoitzak mediku edo erizain bera ikus dezan artatzen duten bakoitzean; lan baldintza duinak behar dira osasun arloko langileek ez dezaten alde egin; eta horrek guztiak eskatzen du osasun sistemaren eta, bereziki, lehen mailako arretaren aurrekontua handitzea, kalitatezko arta presentziala bermatzeko».

Morenok eredutzat jo ditu azken asteetan Nafarroako hainbat herritan egin dituzten protestak, osasun sistema publikoaren alde. «Sakana, Bortziriak, Baztan... Hainbat eskualde hasiak dira mobilizatzen, eta eredu hori hedatuko da pixkanaka».