Martiarena eta Torregarai ‘Harpa jotzen’ ibiliko dira podcast batean

Podcast bat baino, pozkasta egiten hasi dira Mirari Martiarena eta Idoia Torregarai umoristak. Harpa jotzen izena jarri diote egitasmoari, eta, astelehenetik aurrera, bi astean behin sareratuko dute, EITB Podkast atarian eta ohiko audio plataformetan. Zortzi atal grabatu dituzte, Hiru Damatxo ekoiztetxearen laguntzaz. Soinu teknikaria, berriz, Iñigo Etxarri da.
Podcastak bi zati izango ditu: lehenengoan, gai jakin baten inguruko solasaldia egingo dute bi gidariek. Besteak beste, honako gai hauek landuko dituzte umorezko tonuan: barrea, kuadrilla, sexua, lo egitea, mendia eta euskara. Bigarren zatian, gai horren inguruko elkarrizketa «xelebrea» egingo diote gonbidatu bati.

Asteleheneko estreinaldian, lehen gonbidatua Bea Egizabal aktore eta bakarrizketaria izango da. Hauek izango dira hurrengo elkarrizketatuak: Lorea Agirre Jakin-eko zuzendaria, Jon Plazaola aktorea, Manu Etxezortu Euskadi Irratiko esataria, Iñigo Antsorregi ETBko Biba zuek! saioko gidoilaria, Aitziber Garmendia aktorea, Ana Galarraga Elhuyarreko zientzia dibulgatzailea eta Joxe Rojas Tokikomeko IKT eta komunikazio zuzendaria.

Podcastaren aurkezpena Donostian egin dute, gaur, EITBren Miramongo estudioetan. «Elkarrizketatuei harrera gure estiloan egingo diegu: harpa jotzen», iragarri du Torregaraik. Martiarenaren arabera, «biktimak eta konplizeak» izango dira podcasteko gonbidatuak. «Ezagutzen gaituzte».

Ordu erdi inguru iraungo du atal bakoitzak. «Erraz entzutekoak dira», esan du Martiarenak. «Gainera, beste podcast batzuei ziria sartuko diegu».

Torregaraik nabarmendu du solaserako gaiak ez direla denak kontu mardulak izango: «Gauza txikiekin gozatu nahi dugu». Bestetik, umoristak azaldu du sare sozialetan atalek zabalpena izatea nahi dutela. Horretarako, #Harpajotzen traola sustatuko dute.

Podcastaren irudian, harpa bat ageri da. Horrekin atera dituzte argazkiak bi umoristek. Podcastaren irudia edo logoa, berriz, Unai Gaztelumendi marrazkilari eta bertsolariak sortu du.

«Umore faltan»
Aurkezpenean, EITB Podkasteko koordinatzaile Ainhoa Etxebestek eta EITBko Audio eta Digitaleko zuzendari Maite Goñik ere parte hartu dute. Etxebestek azaldu du ari direla EITB Podkast edukiz betetzen: «Baina Euskal Herrian umorez urri samar ez ote gabiltzan iruditzen zaigu, eta edukietan horren falta sumatzen genuen». Goñik, era berean, Euskal Herria «umore faltan» ez ote dagoen esan du: «Martiarena eta Torregarairen proposamena jaso genuenean, horren bila genbiltzan. Umorearen haria indartu nahi dugu», nabarmendu du Goñik. «Gainera, Martiarena eta Torregarai oso ezagunak dira euskararen ingurunean, han eta hemen bakarrizketak eta aurkezpenak egiten baitituzte. Barre egin nahi dugu haiekin».