Inauteriak
Osasun publikoa aldarrikatuz hasi dituzte inauteriak Tolosan
Kabi Alai elkarteko kideek bota dute txupinazoa, 12:00etan. Ospitale publiko bat eraikitzeko eta pentsiodunei pentsioak igotzeko eskatu dute.
Hainbat aldarrikapenekin eman diete hasiera aurtengo Tolosako (Gipuzkoa) inauteriei. Ohi bezala, eguerdirako jarri dute ordua, Plaza Zaharrean, txupinazorako. Kabi Alai elkarteko kideek hitza hartu dute, udaletxeko balkoitik. Alkatearen eta udal ordezkarien rolean, inauteriei ongietorria emateko pregoia irakurtzen hasi dira: «Kaixo, tolosarrok. Hemen zaudetenok eta falta direnak. Inauteri berri on, denoi!».
Plazatik zetozen oihuek eten dute, ordea, hitzaldia. Hainbat pertsona balkoi azpira gerturatu dira, bi ilaratan, eskailera bana hartuta: «Herriak nahi duena, osasun publikoa!», zioten behin eta berriz. Pentsiodunen aldeko eskaerak ere egin dizkiete udaleko ordezkariei: «Pentsiodun guztientzat 1.070 euro!», esan dute. Eskailera jarri, eta balkoian gora igo dira, udaletxean hainbat pankarta zintzilikatzeko: «Sagardui, iruzurrik ez! Osasun publikoa orain!" eta «SOS Alde Zaharra» zioten. Udalak eskakizun horiek beteko zituela hitzeman ondoren amaitu da haien hitzaldia.
Kabi Alai kuttuna
Aldarrikapenen ondoren piztu da festa. Antxon Elosegi izendatu dute Kabi Alai kuttuna, eta bera arduratu da suziria botatzeaz. Inauterien eta herriaren alde egindako lana eskertu nahi izan diote keinu horrekin. Haren hitzen atzetik ekin diote tolosarrek ospakizunari: «Gora ostegun gizen! Gora Tolosa! Gora inauteriak!» oihukatu baitu. Txaranga doinuak gailendu dira ondoren, eta haren atzetik joan dira tolosarrak, kalez kale.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
