Krisiak krisi, iazkoa urtea oparoa izan da CIE Automotiventzat. Enpresak 300,1 milioi euroren irabaziak izan zituen 2022an, aurreko urtean baino %12,2 gehiago. Fakturatutako kopuruak ere gora egin du ekitaldi honetan, hots, 3.838,6 milioi euro erregistratu zituzten iaz, 2021ean baino %24,1 gehiago.
Prentsa ohar baten bidez, goraipatu egin dituzte «egoera makroekonomiko kaskarraren aurrean lortutako salmenta kopuru errekorrak». Are, adierazi dute «geldiezina» izaten ari dela konpainiaren hazkundea. Horren adierazlea da enpresak lortutako 400 milioitik gorako etekin operatiboa. EBITDA erakusleak, berriz, 630 milioi euroak gainditu ditu.
Hain justu, CIE Automotiveko kontseilari ordezkari Jesus Maria Herrerak azpimarratu du etekin operatiboak sortzeko «gaitasuna» dela haien «hazkunde organikoaren indargunea». Hazkunde hori 2022ko merkatuko batez bestekoa baino hamar puntu handiagoa da.
Azkenik, berretsi dute bete egingo dituztela 2025era bitartean finkatutako konpromiso guztiak.
