Mendi ibilaldiak

Mendiko ibiltarien jaia izango da martxoaren 12an Elgetan

Joan den urteko iraupen luzeko mendi ibilaldien zirkuituan parte hartu zuten mendizaleak elkartuko dira bertan. Goizean mendi ibilaldia eta ondoren bazkaria izango dute. Martxoaren 26an abiatuko da 2023ko zirkuitua.

Iraupen luzeko mendi ibilaldi bateko irudia. BERRIA
ramon olasagasti
2023ko martxoaren 1a
10:34
Entzun

Euskal Mendizale Federazioak antolatzen dituen iraupen luzeko mendi ibilaldien zirkuituan parte hartzen duten mendizaleek martxoaren 12an dute hitzordua Elgetan, Ibiltarien Jaian. 2022ko egutegia festa giroan itxi, iazko finalistei diplomak banatu eta 2023ko egutegiaren berri emango da jai horretan.

Goizean goiz, ohikoa denez, mendi ibilaldia egingo dute, goizeko 8:00etan abiatuta. Ibilbidea, hauxe: Elgeta, Asentzio ermita, Intxorta, Erdella, Egoarbitza, Azkonabitza, Elgeta. Ibilaldirako izena emateko epea zabalik izango da martxoaren 10era arte. Izen-ematea doan da, eta zirkuitu kanalaren bidez egin daiteke (www.zirkuitua.com). Ibilaldiaren ondoren, dutxak izango dira Elgetako kiroldegian. Eta bezperatik Elgetara bertaratu nahi dutenentzat, kiroldegia aurretiaz prestatuta egongo da lotarako. Norberaren esku geratuko da lo‐zakua eta koltxoiak eramatea.

Ibilaldiaren ondoren, iazko zirkuituko ibilaldietan parte hartu zuten finalistei aitortza egingo zaie diploma bana emanda, eta jarraian, bazkaria egingo da Elgetako kiroldegian bertan.

Urtez urte, iraupen luzeko mendi ibilaldien zirkuitua oso arrakastatsua izaten da. Batez beste, 10.000-12.000 lagun inguruk parte hartzen du, eta horien artean 7.000 izen emate berri izaten dira urtero. Aurten, martxoaren 26an abiatuko da zirkuitua, Villabona-Amasako Aizkardi mendi taldeak antolatzen duen ibilaldiarekin. 2023an, 20 ibilaldi izango dira guztira zirkuituan. Horien berri emango dugu aurrerago.

IBILTARIEN JAIA
MENDI IRTEERA
08:00: Mendi ibilaldiaren hasiera Elgetako kiroldegitik
Elgeta, Asentzio ermita, Intxorta, Erdella, Egoarbitza, Azkonabitza, Elgeta
13:15 – 14:15: Dutxak Elgetako kiroldegian
14:00:2022-ko finalistei diploma banaketa
Izen‐ematea: www.zirkuitua.com
Martxoaren 10‐era arte. Doan.

BAZKARIA
14:30: Elgetako kiroldegian
Menua: Gula-entsalada eta odolki nahasia; txahal-erregosia edo bakailaoa labean; gazta-tarta edo etxeko intxaurrak.
Prezioa: 30 €
Izen‐ematea: Elgetako udalean
Martxoaren 10‐era arte / hasta el 10 de Marzo
Antolatzaileak: Kantsatzeke M.T.,Elgetako udala, Euskal Mendizale Federazioa
Informazioa: www.zirkuitua.com
Harremanetarako: 943.768.022 E‐mail: danonartian@elgeta.eu

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.