Beirazko ontziak fabrikatzen dituen Arabako enpresak goranzko joera hartu du berriro. 2021eko ekitaldiko beherakadaren ostean, %5,8 hazi da iaz. Izan ere, 153,7 milioi euroren irabaziak izan ditu 2022an.
Salmentei dagokienez ere, emaitza onekin amaitu zuten iazko ekitaldia, hots: 1.345 milioi eurorenak izan ziren; 2021ekoarekin alderatuta, %24,1 gehiago. EBITDA erakuslea ere positiboa da, 270 milioi euroak gainditu baititu. Gaur-gaurkoz, 3 mila milioi eurotik gorako balioa du burtsan.
Enpresak Laudion du egoitza nagusia. Urtea makal hasi zuen, 2022ko lehen hiruhilekoan 800.000 euroren irabaziak izan baitzituen, 2021ean epe berean baino ia %98 gutxiago. Arabako taldeak, ordea, azpimarratu du «pixkanaka hobetzen» aritu direla urtean zehar, eta espero dutela aurten joera horixe bera mantentzea.
Besteak beste, pandemiaren amaierak eragina izan du salmenten gorakadan, ostalaritzaren jardueraren igoeraren ondorioz handitu egin baita beirazko ontzien eskaria.