Gizonezko bat atxilotu dute Iruñerrian emakume baten bortxaketarekin lotura izan dezakeelakoan. Emakumeak salatu duenez, otsailaren 17ko asteburuan buelta bat ematera atera zen beste lagun batzuekin, baina, garai batetik aurrera, zenbait momentu ez ditu gogoan, eta lauso gogoratzen du nahi ez zituen baina ekidin ezin zituen gauzak egiten ari zela.
Salaketa bat ipini zuen, eta sexu erasoen aurkako protokoloa martxan jarri zuten. Ikerketaren ostean, 30 urteko gizonezko bat atxilotu zuten. Astelehenean pasatu zen epailearen aurretik, eta aske utzi zuten. Dena den, 150 metroko urruntze agindua jarri diote, eta ezingo da biktimarekin komunikatu.
