Iraupen eskiko Euskal Herriko Txapelketak jokatuko dira asteburuan Larra-Belaguan

Iraupen eskiko Euskal Herriko Txapelketak jokatuko dira asteburu honetan Larra-Belaguako (Nafarroa) eski estazioan. Larunbatean, esprinteko probak jokatuko dira, teknika librean: 1,2 km-ko distantzian seniorrak, 20 urtez azpikoak, 18 urtez azpikoak eta 16 urtez azpikoak, eta 500 metroko distantzian txikienak (14, 12 eta 10 urtez azpikoak). Igandean, berriz, teknika libreko banakako probak jokatuko dira, erlojuaren aurka. Seniorrek eta 20 eta 18 urtetik gorakoek 10 km osatu beharko dituzte, 16 eta 14 urtez azpikoek 5 km eta txikienek (12 eta 10 urtez azpikoek) 2,5 km. Bi egunetan goizeko 10:00etan hasiko dira probak. Era berean, Iraupen Eskiko Espainiako Koparako puntuagarriak izango dira asteburu honetako probak.

Euskadiko nahiz Nafarroako Txapelketen bigarren fasea izango da asteburu honetakoa. Aurreko fasea, otsailaren 11-12an jokatu zen Candanchun. Orduko hartan, teknika klasikoko erlojuaren kontrako probak (kategoriaren arabera, 10 km, 5 km eta 2,5 km-ko distantzian), eta errelebo mistoetako probak jokatu ziren. Errelebo mistoetako proban, hiru eskiatzaileek talde berekoak izan behar zuten, eta kideetako batek gutxienez neska edo mutila izan behar zuen (bi neska eta mutil bat edota bi mutil eta neska bat). Lehen erreleboa klasikoan egin behar zuen hirukoteko lehenak, eta hurrengo biak skating eran.

Larunbatean, banakakoan, Irati Cuadrado (Irrintzi) nagusitu zen, Alaia Juaristi (Uzturre) eta Berta Perezen aurretik. Mutiletan, berriz, Lander Martin (Irrintzi) gailendu zen, Jaume Pueyo kataluniarra izan zen bigarren eta Peio Añarbe (MGSTZ) hirugarren. Hamasei urtez azpikoetan, Ainhoa Montoya (Uharte) izan zen irabazle, Laia Azpilgain (Uzturre) bigarren eta Nerea Cestona (Uzturre) hirugarren. Mutiletan, berriz, Luka Garcia-Freska (Uharte) nagusitu zen, Bruno Escudero (Mayencos) eta Ibai Letonaren (Irrintzi) aurretik.

Hamalau urtez azpikoetan, June Aranburu (Uzturre) izan zen txapeldun, Marie Mondot (Azun) izan zen bigarren eta Helene Bueno (Roncal) hirugarren. Mutiletan, Adur Redrado (Roncal) izan zen lehena, Izei Irigoien (Roncal) bigarren eta Daniel Louey (Azun) hirugarren.

Eta 12 urtez azpikoetan, Libe Curras izan zen irabazle, Emmy Caze bigarren eta Iradi Elvira hirugarren. Mutiletan, Pey Abbdie gailendu zen, Beñat Irigoien eta Iker Aranbururen aurretik.

Igandean, errelebo mistoetako proban, Irrintzi taldekoak (Martin, Martinez, Cuadrado) izan ziren garaile, Uhartekoak (Razquin, Montoya, Sanz) bigarren eta Uzturrekoak (Amantegi, Juaristi, Juaristi) hirugarren. Hamasei eta hamalau urtez azpiko kategorian, berriz, Mayencoseko hirukoa (Cajau, Lanau, Escudero) nagusitu zen, Uhartekoak (Garcia, Larramendi, Barrio) izan ziren bigarren eta Roncal taldekoak (Redrado, Bueno, Irigoien) hirugarren.

Asteburuko egitaraua
Larunbata, martxoak 11
9:00 - 9:30: Dortsalak jasotzea irteerako eremuan.
10:00: Lasterketen hasiera.

Igandea, martxoak 12
9:00 – 9:30: Dortsalak jasotzea irteerako eremuan.
10:00: Lasterketen hasiera.