Herrialdeen arteko Munduko Sokatira Txapelketa amaitu da Parkgaten (Ipar Irlanda). Azken unean lortu du euskal selekzioak goma gainean lortutako urre bakarra 2014an behin betiko ofizialtasuna lortu zuenetik. Eskoziaren aurka irabazi du finala. Finalaurrekoetarako sailkatzeko lehian berdindu egin dute bi taldeek, baina finalean gehiago izan da euskal zortzikoa, eta garaipen estua lortu du Lesakako Beti Gaztek ordezkatu duen euskal selekzioak.
Taldeen arteko Munduko Txapelketan 18 domina lortu zituzten euskal taldeek; urrezko bost, zilarrezko zortzi eta brontzezko beste bost. Herrialdeen artekoan, berriz, bost domina izan dira; urrezko bat, zilarrezko hiru eta brontzezko bat.
Beste urte batzuetan baino herrialde gutxiago aritu dira aurtengoan lehian, baina maila handiko txapelketa izan da, bereziki Irlandak, Ipar Irlandak, Eskoziak, Txinak eta Taiwanek emandako mailagatik.
