Euskalgintzak euskarazko hezkuntzaren alde mobilizatzera deitu du ostegunerako

«Ustez gure belaunaldiak gainditutzat zeuzkan diskurtso eta jarrera euskarafoboak eguneroko ogi bihurtzen ari zaizkigu». Salaketa hori egin dute gaur goizean euskalgintzako zenbait eragilek, Donostian. Bertan izan dira, besteak beste, Gazte Euskaltzaleen Sareko, AEK-ko, Euskalgintzaren Kontseiluko, Jakineko, Euskal Herrian Euskaraz-eko eta Hizkuntz Eskubideen Behatokiko ordezkariak. Haien irudiko, epaileek «mailuka» erakutsi nahi dute euskaldunak noraino hel daitezkeen eta noraino ez. Hori ikusita, erantzun beharra dagoela uste dute, eta Gazte Euskaltzaleen Sareak, EHU Euskal Herriko Unibertsitateko euskara taldeek eta Ikamak Hezkuntza euskaraz izan behar da lelopean datorren ostegunerako antolatu dituzten protestetan parte hartzera deitu dute.

Azken urteko panorama analizatuz hasi dute ekitaldia. Maiatzean beteko da urtebete Gazte Euskaltzaleen Sareak lehen manifestazioa antolatu zuenetik, eta, gaur nabarmendu dutenez, harrezkero ere ez dira geldirik egon: «Herrietan, auzoetan eta ikastetxeeetan Gazte Euskaltzaleen Sarea zabaltzen eta gazteok euskaraz bizitzeko eskubideen aldeko borrokan eragile aktibo izan beharra aldarrikatzen aritu gara». Alabaina, «beste batzuk» ere mugitu direla ikusi dute: «Orain dela ia urtebete aipatzen genuen euskaraz bizi nahi dugunon aurkako oldarraldi politikoak, juridikoak eta mediatikoak ez du etenik izan denbora honetan».

Uste dute «oldarraldi» horrek «gogor» jo duela euskara, «bai euskaldunon hizkuntza eskubideen urraketan ahalbidetuko dituzten epaien bidez, bai eta urraketa horiek justifikatzeko diskurtsoen bidez ere». Bereziki aipatu dute Uliazpi egoitzako epaia. «Epaileak eta magistratuak hizkuntza politika erreakzionarioak garatzen ari dira, eta eraso zuzenak egiten ari dira gure herriak —aurreko belaunaldiek— hizkuntza politikak garatzeko eskuratutako eskuduntzen aurka».

«Eraso» horien aurrean, ezinbestekotzat jo dute herritarrek erantzutea: «Erantzun bateratu bat, herri erantzun bat eskatzen du horrek». Eta hor kokatu dituzte, besteak beste, datorren osteguneko mobilizazioak: «Martxoaren 23an, hezkuntza euskaldunaren aldeko mobilizazioan, kaleak bete behar ditugu».

Hori, ordea, bidean egin behar den urrats bat baino ez da euskalgintzako eragileentzat: «Bide horretan, urrats gehiago egin beharko dira. Horregatik, erasoaren neurriko erantzuna emateko urratsak egitera deitu nah ditugu hemendik gizarte eragileak, eragile sindikalak eta eragile politiko eta instituzionalak».

Lau manifestazio

Gazte Euskaltzaleen Sareak lau manifestazio antolatu ditu datorren ostegunerako, hezkuntzak euskaraz izan behar duela eskatzeko. Hego Euskal Herriko lau hiriburuetan egingo dituzte, 12:00etan. Atxikipenak jasotzen ari da deialdia: esaterako, ELA, LAB eta Steilas sindikatuek protestetan parte hartzera deitu dute.

Ikasleen artean ere sumatzen ari da auziak eragiten duen ezinegona. Izan ere, sare sozialen bidez, zenbait ikaslek euskarazko hezkuntza jasotzeko izan dituzten zailtasunak azaldu dituzte.