Asteburu honetan hasiko da Euskal Mendizale Federazioak eta Nafarroako Federazioak biek eskutik antolatutako mendiko lasterketen Euskal Herriko Kopa. Bi federazio, zazpi herrialde, zortzi lasterketa... horrela abiatzen da Euskal Herria osotasunean aintzat hartuko duen Kopa iragartzeko bideoa. Lineako proba hauek 40 km artekoak dira, gutxi gorabehera 1500 eta 2000 metro arteko desnibel positiboa dutenak. Bediako (Bizkaia) Kolazino eguna izango da lehenbizikoa, bihar bertan.
Iaz egin zuten aurrenekoz mendiko lasterketen Kopa hau, Mireia Trigueros EMFko eskalada eta mendi lasterketen sekzioko arduradunak jakinarazi duenez. «Joan den urtera arte beste modu batera kudeatzen ziren lasterketak: ranking bat zegoen, lasterketa pila bat zegoen, eta haietan lortutako puntuazioaren arabera, rankingean gorago edo beherago zeuden korrikalariak. Guk beste era batera kudeatzea erabaki genuen, lasterketei protagonismo handiagoa emateko, probetan arbitraje bat izateko... eta Kopa moduan antolatzea erabaki genuen, beti egin izan den moduan. Iaz oso harrera ona izan zuen, eta aurten lau beharrean, zortzi proba sartu ditugu Kopan».
Biharko Kolazino Egunaren ondoren, Kopako bigarren proba, Kilimon Trail, Euskadiko Txapeketa izango da aurten. Mendaroko lasterketak, gainera, 10. urteurrena beteko du aurten. Kopa osatuko duten beste proba batzuen artan, Berako maratoi erdia, mendiko lasterketetan proba aitzindarietako bat, egutegian izango da aurten: XVII. Edizioa izango du lasterketak. Bukatu, berriz, Azkaingo Skyrhune entzutetsuarekin bukatuko da Kopa. Proba hori Golden Trail National Series nazioarteko zirkuituaren egutegian dago eta maila handiko korrikalariak hurbiltzen dira Azkainera (Lapurdi). Dena den, «azken proba horretara arte Kopako sailkapenean aurrena doazen hamarrek, bai emakumezkoek eta bai gizonezkoek, ziurtatua izango dute dortsala», jakinarazi du Triguerosek.
Zortzi proba horietatik bost emaitzarik onenak hartuko dira kontuan puntuaziorako, eta biharko Kolazino Eguna probak eta Irati Trail lasterketak % 20 gehiago puntuatuko dute. Izen-emateak irekita daude proba gehienetan, eta batean baino gehiagotan dortsalak amaituta ere bai.
Ultra distantzian, lau proba
Ultra distantziakoa ere Euskal Herriko Kopa izango da: «Enkarterrietakoarekin hasiko gara apirilaren 15ean, denbora laburrean ospe handia hartu duen Domusa Teknik izango da hurrengoa, gero etorriko da Leitzako Euskal Herria Mendi Erronka, eta azkena Beasaingo G2H izango da. Goierriko bi handien proba, gainera, ultra distantziako Euskadiko Txapelketa ere izango da».
Lasterketa bertikaletan, berriz, EMFren egutegian bakarra izango da aurten: Txindokiko Kilometro Bertikala, hain zuzen. Maiatzaren 7an izango da bertikal hori, Kanpezuko probaren egun berean.
Iaztik hona, gazteen kategorietan (kadeteak, jubenilak eta juniorrak) «jauzi garrantzitsua» izan dela azpimarratu du Triguerosek. «Denboraldi hasieratik bultzada handia eman nahi izan diegu gazteen kategoriei, eta teknifikazio talde bat sortu dugu 14 urtetik 17 urte bitarteko gazteekin. Iaz bost bat partaide izango ziren kategoria bakoitzean, eta aurten, adibidez Kolazino Egunean, 40 izango dira. Handia izan da jauzia. Aurreko asteburuan, adibidez, teknifikazio saio bat egin genuen Ander Garmendia entrenatzailearekin eta oso harrera ona izan zuen».
Nesken partaidetza ere pixkanaka gora doala azaldu du Trigerosek, eta horri ere bultzada ematen saiatuko direla nabarmendu du.
Logo berria ere sortu dute Koparako, podium baten itxura hartzen duten hiru mendiz osatua, urdinez lineako lasterketetarako, eta gorriz ultra distantziakoetarako. Aurten, 4.000 euro banatuko dituzte sarietan. Federazioen asmoa da Kopako probak bi urtean behin-edo aldatzen joatea, urtea joan eta urtea etorri beti berberak izan ez daitezen. «Egutegia zerbait dinamikoa izatea nahi dugu, beste probei ere aukera ematea, herri txikietako lasterketei ere bultzada ematea, arbitraje, irizpide eta arau jakin batzuen bidez proba horietan hobekuntzak sartzea...».
Lineako lasterketen Euskal Herriko Mendiko Kopa
Martxoak 18Kolazinoko Mendi Eguna (24 km / 1.700+)
Apirilak 1Kilimon-Trail (23 km / 1.650+)
Apirilak 16Berako Maratoi Erdia (21 km / 1.750+) Manttale
Maiatzak 7Kanpezu-Ioar Mendi Maratoi-Erdia (26,5 km / 1.930+)
Ekainak 3Irati Trail (31 km / 2.100+)
Ekainak 24Amurrio trail (31 km / 1.850+)
Uztailak 22Baztandarrak (21 km / 1.700+)
Irailak 23Skyrhune (21 km / 1.700+)
Ultra distantziako Euskal Herriko Kopa
Apirilak 15Enkarterri Extrem
Maiatzak 6 Domusa Teknik 40MLK
Ekainak 3EH Mendi Erronka
Uztailak 7-8 G2H
Euskadiko Txapelketak (EMF)
Lineakoa
Apirilak 1Kilimon Trail
Kilometro Bertikala
Maiatzak 7Txindoki KB
Ultra
Uztailak 7-8G2H
