Gogorra izan zen Athleticeko zaleentzat iragan asteko partida. Zuri-gorriek 0-1 galdu zuten etxean Bartzelonaren aurka, eta azken minutuetan baliorik gabe utzi zuen epaileak Iñaki Williamsek berdinketa ezartzeko sartutako gola. Zuri-gorriak, baina, ederki altxatu dira jasotako kolpetik. Partida osoa jokatuta irabazi du Ernesto Valverderen taldeak Valladoliden. Iñigo Martinezek aurreratu zituen bisitariak, eta atsedenalditik bueltan Gorka Guruzetak bigarrena egin zuen. Cyle Larinek esperantzaren gola sartu zuen etxekoentzat, baina handik bi minutura Mikel Vesgak hirugarrena egin zuen, penaltiz. Irabazita, bi puntura du seigarren postua Athleticek.
Ederra izan da partida hasiera. Bi taldeak hiru puntuen bila zelairatu dira, eta Valadolidek izan ditu neurketako lehen aukerak zaleen bultzada baliatuta. Athleticen atzeko lerroa ez da oso fin aritu, baina Julen Agirrezabalak beste behin erakutsi du punta-puntako atezaina dela. Zuri-gorriek gora egin dute minutuak aurrera joan ahala, eta Guruzetak lehenbizi eta Vesgak ondoren lehenengoa egiteko aukera izan dute. 30. minutuan iritsi da, ordea, gol hori. Area ertzean falta bat gogor jaurti du Iñigo Martinezek, eta atzelari baten gorputzean jo ostean sartu da sarera baloia. Atezainak ezin izan du ezer egin.
Partida lasaiago bat ikusi da golaren ostean, eta atsedenaldira 0-1 joan dira. Bigarren zatian bigarrenaren bila abiatu da Athletic, beldurrik gabe, eta lehen aukera bat huts egin ostean, bigarrenean sarera bidali du baloia Guruzetak. De Marcos hamaikagarrenez iritsi da area ingurura eskuin hegaletik, eta atzelariaren erdiraketa maisuki errematatu du Donostiako aurrelariak: 0-2 56. minutuan.
Markagailu horrek aldaketak egitera behartu du Pacheta, eta orduan iritsi dira etxekoen minutu onenak. Athletic atzean sartu da, atzeko hutsuneak itxiz, eta kontraerasoan soilik egin du aurrera. Valladolid bila eta bila aritu da, eta azkenean aurkitu dute gola etxekoek. Cyle Larin izan da goleatzailea. Dani Garciak irrist egin du area barruan baloia ateratzear zegoela, eta Agirrezabalak lehen saiakera zapuztu badu ere, bigarrenean ez du huts egin Larinek.
Etxekoek berdinketarekin amestu dute orduan, baina berehala esnatu ditu epaileak. Handik bi minutura penaltia egin du Joaquinek, besoan eman baitio baloiak. Vesgak hartu du erantzukizuna, eta arabarrak lasaitasunaren gola egin du zuri-gorrientzat. Bertan amaitu da etxekoen ametsa, eta baita partida ere. Irabazita, bi puntura du Europa Athleticek, aurkariek baino partida bat gehiago jokatuta.
