Hiru kilometro daude Iruñeko Labrit pilotalekutik Nafarroa Arena pabiloira. Hango frontoian jokatuko dute apirilaren 2an Eskuzko Pilota Enpresen Ligako (EPEL) Binakako Txapelketako finala; lehen aldiz jokatuko da han binakakoaren finala. Hara iristeko bidearen zati handi bat egina dute Unai Lasok eta Ander Imazek. Bi partida jokatu dituzte finalerdietako ligaxkan, eta biak irabazi dituzte: duela astebete, 22-21 hartu zituzten mendean Jokin Altuna eta Xabi Tolosa; gaur, berriz, 22-19 nagusitu zaizkie Aitor Elordiri eta Jose Javier Zabaletari Labriten.
Horri esker, oso bideratuta dute finala jokatzea. Bihar bertan ziurta dezakete bigarren urtez jarraian txapela irabazteko lehian aritzea. Nahikoa dute bihar Jokin Altunak eta Xabi Tolosak Jon Ander Peñari eta Jon Mariezkurrenari irabaztea. Eibarko (Gipuzkoa) Astelena pilotalekuan jokatuko da bigarren jardunaldiko azkeneko norgehiagoka. Hau da, Lasori eta Imazi enpresakideek galtzea komeni zaie. Bestela, astebete itxaron beharko dute azken urratsa egiten saiatzeko. Hala ere, esku-eskura lukete. Handia gertatu beharko litzateke finala ez jokatzeko. Historiak ere halaxe dio: behin bakarrik ez da bikote bat sailkatu finalerako, ligaxkako aurreneko bi neurketak irabazi eta gero. Aimar Olaizolari eta Imazi gertatu zitzaien, 2018an.
Gainera, Laso eta Imaz konfiantzaz gainezka iritsiko dira azken partida horretara: unerik aproposenean suspertu dira. Lehen jardunaldian, ligaxkan eta kanporaketan baino askoz hobeto aritu ziren. Gaur, berriz, beste koska bat egin dute gora: bikain aritu dira. Laso nabarmendu da: aspaldiko partidarik onena jokatu du, eta zutik jarri du hainbat tantotan Labrit: hamahiru egin ditu, eta bost huts egin. Hark egin du distira gehien, baina Imazek oso ondo lagundu dio. Meritu handia du horrek, parean Zabaleta zegoela kontuan hartuta.
Elordi, nerbioak jota
Batzuen gozamena, besteen ezina. Gaur galduta, Elordi eta Zabaleta azkeneraino borrokatu beharko dira finalerako sailkatzeko. Ikusgarri ibili dira gaur arte, aurkari guztiak hankapean ibilita: batez beste hamalau tanto besterik ez zizkieten egin partidako. Baina, gaur, aurreneko aldiz, ezinean aritu dira. Elordirena izan da ezinik handiena. Aurrelaria ametsetako estreinakoa egiten ari zen binakako nagusian, baina gaur, ametsa amesgaizto bilakatu zaio. Urduritasunak jota aritu da hasi eta buka, eta ez da inongo unetan haren maila emateko gai izan. Argigarriak dira haren datuak: hiru tanto bakarrik egin ditu, eta zazpi huts egin.
Apur bat hobeto aritu izan balitz, ziurrenik irabazi egingo zuten hark eta Zabaletak, atzelaria berriro ikusgarri aritu baita. Sei tanto egin ditu, eta bi huts egin. Zenbaki bikainak dira atzelari batentzat, baina alferrikakoak gaur; laguntza falta izan zaio.
Hari esker eutsi diote Aspekoek lehiari, hasiera-hasieratik izan baiu Baikokoen aldeko joera: 5-1. Lasok bi tanto egin ditu, eta Elordik hiru pilota galdu. Baina Zabaleta egurrean hasi, eta partida berdindu egin da.
Laso berehala ohartu da tantoa luzatzeak kalte egiten ziela: Zabaletaren joa nagusitzen zen. Erritmoa bizitu behar zuen, eta jokoa nahastu. Pentsatu eta egin; ondo egin. Gainera, Elordik suspertu ezinda zegoen. Horrela, alderik handiena lortu dute: 15-10.
Baina Elordiren susperraldi txiki batek eta Zabaletaren pilotakadek aldea murriztu dute: 15-14. Lasok beste astindu bat eman dio partidari (19-15), baina ez da erabakigarria izan, gorriak hutsak egiten hasi baitira. Lasok kanpora bidalitako bipareta bati esker lortu dute urdinek 19. tantoa. Baina berehala atera du arantza buruz buruko txapeldunak: lehenbizi, tanto ikusgarria lortu du ezker gantxoz; eta, ondoren, sakez, biparetaz. Elordiren huts batekin amaitu da lehia. Azken bi tantoek ezin hobeto islatu dute Labriten gertatutakoa: batzuen konfiantza, eta besteen ezina.
Laso eta eta Imaz, eta Elordi eta Zabaleta bihar gertatzen denari begira egongo dira. Asko dute jokoan Altuna III.a eta Tolosak eta Peña II.a eta Mariezkurrena II.ak, bi bikoteek galdu baitzuten lehen jardunaldian. Baikokoak aukerarik gabe geratuko dira galtzen badute, eta Aspekoak, ia kanpoan.
