Garaipena behar zuen Realak, eta lortu du. Imanol Algualcilen taldea ez da une gozoa bizitzen ari, eta gaur ezin zuen hutsik egin: azken sailkatua jaso du etxean, Elx, bai ala bai irabazi beharreko partidan. Eta egin du, Take Kubok eta Ander Barrenetxeak bigarren zatian sartutako golei esker.
Donostian aste osoa zeramaten «partida tranpa» zela esanez. Elxek hamahiru puntu bakarrik ditu sailkapenean (26 ditu Almeriak, 19.ak), eta jada ez du ia ezer jokoan. Presioa, beraz, etxekoentzat zen gaurkoan, are gehiago sailakpen nagusian aurkari zuzena den Betisek irabazi egin duela jakinda. Horren jakitun, ez du hamaikakoan aldaketa handirik egin Alguacilek, eta onenak zelairatu ditu. Berrikuntza nagusiak Aihen Muñoz eta Asier Illarramendi izan dira.
Baloiaren jabetza, espero zen moduan, Realak izan du. Lan egin behar izan duen lehen atezaina, ordea, Remiro izan da, area kanpotik Gumbauk egin duen jaurtiketa arriskutsu batean. Dena den, Realak izan ditu lehen zatiko aukera argienak; besteak beste, Kubok Silvarekin jositako bi jokalditan. Dena alde zuela, Kubok kanpora bota ditu biak. Kanariarrak ere zutoinera bidali du baloi bat, eta Sorlothek ez du asmatu aldaratzean.
Silvaren eta Kuboren arteko konexio horrek geroxeago eman ditu fruituak, bigarren zatiaren hasieran: kanariarrak pase bikaina egin dio japoniarrari, eta hark ederki gurutzatu du Badiaren aurrean. Bigarren zatiko hirugarren minutua zen, eta Realak zailena egina zuen.
Hortik aurrera, Elx saiatu da erasora egiten, baina asko asmatu gabe. Barrenetxeak itxi du partida 90. minutuan. Norgehiagokako jokalaririk onena Silva izan da, eta merezi zuen moduko txalo zaparradarekin aitortu dio hori Anoetak.
Sailkapen nagusian 48 puntu ditu Realak, eta laugarren postuari eusten dio. 51 ditu Atletico Madrilek, eta 45 Betisek.
Reala: Remiro; Gorosabel, Zubeldia, Le Normand, Aihen; Zubimendi, Illarra (Barrenetxea, 83'), Brais Mendez, Silva (Gebara, 78'); Kubo (Cho, 78') eta Sorloth (Oiartzabal, 63').
Elx: Badia; Morente, Palacios (Lautaro Blanco, 75'), Verdu (Bigas, 60'), Diego Gonzalez, Clerc (Carmona, 75'); Mascarell, Gumbau, Fidel (Josan, 82'); Nteka (Ponce, 60') eta Boye.
