Osasuna 0-3 Vila-Real
Osasunak kolpea hartu du Sadarren
Aurkari zuzena da Vila-Real, eta Chukwuezeren eta Moralesen bi goli esker nagusitu da. Gorritxoek bi hilabete daramatzate Sadarren irabazi gabe.
Olatuaren osteko zulotik atera ezinik dabil Osasuna. Gorritxoek Europan sartzeko lehian dabilen aurkari zuzen bat jaso dute gaur Sadarren, Vila-Real, eta egurra jaso dute: 0-3 nagusitu da Herrialde Katalanetako taldea. Osasunak bi hilabete daramatza ligan etxean irabazi gabe; azkenekoa urtarrilaren 14an izan zen, Mallorcaren aurka.
Gaur ez diote gaizki ekin partidari. Lehen minutuetan hobeak izan dira, baina azkar iritsi da lehen kolpea: Chukwuezek 14. minutuan sartu du Vila-Realen lehen gola, Pedrazaren pase bat baliatuta. Hiru minutu geroago sartu du bigarrena, baina baliogabetu egin diote. Osasunak ez du erreakzionatu. Ezinean ibili da Jagoba Arrasateren taldea atsedenaldira arte.
Aldageletatik beste jarrera batekin atera da. Bigarren zatia hasi eta berehala, epaileak ez du adierazi Osasunaren aldeko penalti bat (Yeremik baloia eskuarekin ukitu du area barruan), eta baloi bat zutoinera ere bidali dute. Esnatu da Sadar, baina ez da iritsi gola, eta neurketa azken minutuetan zela iritsi da Moralesen unea: azken hamar minutuetan bi gol sartu ditu Vila-Realen aurrelariak.
Sailkapen nagusian bederatzigarren da Osasuna, 34 punturekin. Orain 41 ditu Vila-Realek, seigarren sailkatuak.
Osasuna: Aitor; Nacho Vidal (Brasanac, 45'), Aridane, David Garcia, Manu Sanchez; Torro (Ibañez, 78'), Moncayola, Moi; Barja (Kike Garcia, 78'), Ez Abde (Ruben Garcia, 78') eta Chimy Avila (Budimir, 64').
Vila-Real: Reina; Foyth, Albiol (Mandi, 45'), Pau Torres, Pedraza (Mojica, 45'); Parejo, Trigueros, Terrats (Lo Celso, 68'); Chukwueze (Femenia, 85'), Yeremi Pino eta Gerard Moreno (Morales, 35').
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
