Quincoces eta Campos bederatzigarren Munduko Txapelketan

Edozein dela ere kirola, gutxitan izaten du euskal selekzioak nazioartean lehiaketa ofizial batean parte hartzeko aukera, eta asteburu honetan izan da bakan horietako bat: mendiko eskiko euskal selekzioko sei kide Adamello Ski Raid proban lehiatu ziren larunbatean, Italiako Trentino eskualdean, distantzia luzeko Munduko Txapelketan. Guztira hamazazpi naziotako 260 eskiatzaile aritu ziren Adamellon lehian; haien artean, euskal selekzioko kideak.

Goizeko 6:00etan abiatu zen proba, ilunpean. Bikoteek ibilbide oso gogorra zuten aurretik: 30 kilometroko distantzia, 3.115 metroko goranzko desnibela eta 3.455 metroko beheranzko desnibela, lau igoera oso luze, beste horrenbeste jaitsiera eta oinezko bi zati, horietako bat Adamello ertzari jarraituta. «Eguraldia aldakorra izan zuten. 3.000 metrotan tarteka elur pixka bat egiten zuen, gero eguzkia ateratzen zuenean hego aurpegietan bero egiten zuen, eta jaitsiera batzuk arriskutsu zeuden, elur faltagatik. Leku ospeletan, berriz, haizearekin tenperatura -7 gradura jaisten zen… Denetarik izan zuten», jakinarazi du Igor Alzelai euskal selekzioaren hautatzaileak.

Nahia Quincoces mendexarra eta Igone Campos zumarragarra hamar aurrenekoen artean sartzeko helburuarekin joan ziren Italiara, eta lortu dute. Bederatzigarren izan dira azkenean. «Nahia Laponian ibili da aurreko astean, eta nik uste nekea antzeman duela Adamellon. Bizitasun pixka baten faltan sumatu du bere burua, baina, hala ere, Igone eta biak bikain moldatzen dira arnas luzeko lasterketetan, eta eutsi eta eutsi, sekulako proba egin dute», azpimarratu du Alzelaik.

Nahia Quincoces eta Igone Campos, probako une batean. Igor Alzelai / EMF

Mutiletan ere oso lasterketa ona osatu dute Axier Alonso oñatiarrak eta Jon Ander Aranburu zumarragarrak. Munduko oilar guztien artean 29. izan dira azkenean. «Adamellon munduko onenak zeuden. Gainera, italiarrak, frantziarrak, suitzarrak... ohituta daude Alpeetako baldintzetan eskiatzen. Irteera 1.500 metrotik egiten da, eta, lehen igoeraren ondoren, 3.000 metrotan jartzen zara, eta lasterketaren zati handi bat altuera horretan egiten da. Ondorioz, ohituta egon ezean, altueran higatuz doa gorputza», jakinarazi du Alzelaik. «Jaitsieretan ere, alde handia dago. Azken jaitsierak 1.700 metroko desnibela zuen, nahiz eta zati bat oinez izan elur faltagatik, eta guk Pirinioetan ez daukagu horrelako jaitsiera luzerik. Hortaz, zaila daukagu gorputza eta hankak horrelako baldintza eta probetarako prestatzeko». Zailtasunak zailtasun, emaitzarekin gustura dira Alzelai eta euskal selekzioko kideak.

Bikote gazteak, Rafa Urbizu donostiarrak eta Aitor Ajuria otxandiarrak, berriz, ezin izan dute proba bukatu. Horrelako lasterketa luzeetan esperientzia falta, altuerak sortzen duen higadura... «Nahiz eta inolako presiorik ez izan, agian azkartxo hasi ziren, eta bete egin ziren. 3.000 metrotik gorako zati hori gogorra egin zitzaien. Pena izan da, hiru bikoteek bukatu izan balute, selekzioaren jarduna eta bidaia erabat biribila izango baitzen». Arantzatxo horrekin itzuli da Alzelai. «Gainerakoan, ohore bat izan da euskal selekzioarekin, talde honekin, Munduko Txapelketa batera joan ahal izatea. Pozik gatoz lortutako emaitzarekin, datorren urterako lanean jarraitzeko gogoz, batez ere gazteekin eta neskekin, animatu daitezen kirol honetara hurbiltzera».

Partaide baten heriotza, bihotzekoak jota

Mutiletan, Matteo Eydallin eta Robert Antonioli italiarrak izan dira munduko txapeldun. Eydallin hirugarrenez eta Antonioli lehenbizikoz. Hasiera oso estuaren ondoren, bi italiarrak Cresta Croceko igoeran zertxobait aurreratu ziren, eta gai izan ziren helmugaraino aldeari eusteko. Bi bikote frantziar sailkatu ziren haien atzetik: Matheo Jacquemod eta Samuel Equy bigarren, eta William Bon Mardion eta Xavier Gachet hirugarren.

Nesketan, aurreikuspenak bete ziren, eta Axelle Mollaret eta Emily Harrop frantziarrak goitik behera nagusitu ziren hasiera-hasieratik. Bigarren, sei minutu pasatxora, Lena eta Candice Bonnel ahizpak helmugaratu ziren, frantziarrak hauek ere, eta hirugarren, Giulia Compagnoni eta Ilaria Veronese italiarrak.

Alabaina, irabazleen poza, lasterketa bukatzea lortu zuten guztien asebetea eta antolatzaileen aldartea erabat goibeldu ziren lehiakideetako bat bihotzekoak jota hil zela jakin zenean. Omar Ferrero, 42 urtekoa, Turingo probintziako San Secondo di Pinerolo herrikoa, Ivan Monnet bikotekidearekin ari zen lehiatzen Adamellon, bihotzekoa izan zuenean. Laguna bera saiatu zen hasiera batean bihotz-biriketako bizkortzea egiten, ondoren mendiko erreskateko osasun zerbitzuak ere bai, baina alferrik izan zen.

SAILKAPENAK
Emakumezkoak
1.- Axelle Gachet-Mollaret - Emily Harrop 04:57:55.0
2.- Léna Bonnel - Candice Bonnel +00:09:54.0
3.- Giulia Compagnoni- Ilaria Veronese +00:16:43.0
9.- Nahia Quincoces Altuna - Igone Campos Odriozola +01:37:25.0

Gizonezkoak
1.-Robert Antonioli - Matteo Eydallin 04:04:24.0
2.- Matheo Jacquemod - Samuel Equy +00:02:49.0
3.- William Bon Mardion - Xavier Gachet +00:07:02.0
29.- Axier Alonso – Jon Ander Aranburu +01:27:01.0