Kutxa fundazioak lehen Inspira Gazteak jarri ditu abian. Bost sari dira, hamabosna mila eurokoak, 20-30 urte arteko Gipuzkoako gazteen artean banatzeko, eta, haiek emateko, aintzat hartuko dituzte gazteen ibilbide pertsonala eta profesionala, lidergoa, hazkunde potentziala, ekintzailetzarako gaitasuna, merezimendua eta besteentzat eredu izateko modua.
Gizarte, ingurumen eta hezkuntza-berrikuntza gaiekin konpromisoa eta ekintza erakusten duten bizi ibilbideak saritzea da helburua, baita Gipuzkoaren transformazio sozialaren aldeko ezagutza sortzeko eta sustatzeko konpromiso eta ekintza ibilbideak ere.
Goi mailako ikasketak egiten ari diren edo bukatuta dauzkaten 20-30 urte arteko gazteak aurkez daitezke, eta hautagaitzek Gipuzkoako gizartearekin lotura zuzena izan behar dute. Gaur zabaldu da deialdia, eta maiatzaren 26an itxiko da hautagaitzak aurkezteko epea.
Bost kategoria daude sarietan: gizarte ekimenaren arloan, berrikuntzaren bidez arrakala eta desberdintasun sozialak murrizteko egitasmoak eta ekintzak sarituko dira; ingurumen ekimenaren esparruan, berotze globala arintzen eta klima larrialdira egokitzen laguntzen duten gazteak sarituko dira; hezkuntza berrikuntzaren kategorian, ekitatea eta bikaintasuna bermatzeko egitasmoak proposatzen dituzten gaitasun kritikoko eta sortzaileko gazteak.
Ezagutzaren sustapenaren arloan arte, zientzia eta letren ezagutzaren sorkuntzarekin eta sozializazioarekin konprometitutako gazteetan jarriko da fokua. Ekintzailetzaren kategorian, berriz, euren lidergoarengatik zein espiritu ekintzaileagatik nabarmendu diren gazteak saritu nahi dira.
