Hainbat guraso elkartu dira Osakidetzako pediatria zerbitzuaren «egoera larria» salatzeko

«Umeen Osasun Publikoa Aurrera gara, osasun publikoaren egoeragatik kezkatuta dagoen guraso eta tutore taldea». Hitz horiekin hasi dute gaur hainbat gurasok, umeen ondoan, Osakidetzak haurrei arta emateko orduan dituen «zailtasunen» gainean ohartarazteko egin duten agerraldia. Gasteizen egin dute. Haurrekin pediatrarenera doazenean zailtasun asko izaten dituztela adierazi dute: «Administrazioarekin harremanetan jartzeko ezintasuna, itxaron zerrenda luzeak, aurrez aurreko arreta jasotzeko zailtasuna, protokolo komunik eza, denbora gutxi gaixoekin, arreta euskaraz jasotzeko ezintasuna edo zailtasuna...». Arabako egoerari erreparatu diote, bereziki.

Arazo asko, halaber, osasun profesional eskasiaren ondorioa direla adierazi dute. «Askotan, familiek ez dute erreferentziazko erizainik, ezta pediatrarik ere. Profesionalen gaixoaldiak, baimenak eta oporrak ez dira ordezkatzen, eta, ondorioz, zenbait osasun zentro hilabeteak egoten dira pediatrarik gabe. Beste kasu batzuetan, pediatrak ez diren profesionalek artatzen dituzte adingabeak. Uste dugu hori guztia ez dela ausazkoa; lehen mailako arreta desegiten ari dira, eta hau beste ondorio bat besterik ez da». Adibidez, salatu dute oraintxe bete gabe daudela Arabarako esleitutako pediatria postuen laurdenak.

Zailtasun horien guztien atzeko motiboetako bat aurreikuspen falta dela uste dute. «Profesionalek hogei urte baino gehiago daramatzate salatzen ez dagoela pediatriako langile nahikorik; administrazioak, ordea, ez dio egoera horri erantzun urte hauetan guztietan». Arabako landa eremuan, bereziki, egoera kezkagarria dela adierazi dute. «Langilerik ez dagoenez, askotan pediatrarik ez dago, eta familia medikuek arduratu behar dute umeez», azaldu dute. Gabezia horien ondorioz usu familiek larrialdietara jo behar izaten duela adierazi dute, eta arazoak dakartzala horrek erietxetako larrialdi zerbitzuetan: «Joan den hilabetean, asteburu batean, 40 adingabe egon ziren Txagorritxuko larrialdi zerbitzuan».

«Elkartasuna» profesionalei

Kritikak kritika, ororen gainetik «elkartasuna» erakutsi nahi izan diete Osakidetzako langileei: «Gure haurrak artatzen dituzten profesionalei». Haiek usu dituzten lan egoera zailen berri badutela adierazi dute familiek: «Badakigu askotan har dezaketen baino lan gehiago hartu behar izaten dutela, ratioak nabarmen gainditzen dituzten paziente kupoekin, eta lan baldintza prekarioekin. Gainera, haien lan egonkortasuna ez da bermatzen».

Eskari sorta bat ere plazaratu dute. Horra zerrenda: «Pediatriako etengabeko arretarako gune bat sortzea, arreta aurrez aurrekoa izatea, protokolo komunak ezartzea, erreferentziazko pediatrak eta erizainak izatea, profesional bakoitzeko haurren kupoa txikitzea, hizkuntza eskubideak errespetatzea euskarazko arreta bermatuz, eta beste hizkuntzetara itzultzeko zerbitzuaren beharra ere ikusgarri egitea eta erraztea».

Osakidetzaren kudeaketa ereduari dagokionez, errotiko aldaketa bat eskatu dute. «Badakigu gaur egungo egoera hamarkada askoan indarrean egon den kudeaketa politika desegokien ondorioa dela», adierazi dute: «Horregatik, aldaketa garrantzitsuak egitea atzeraezina da. Mugarri bat ezarri behar da, osasun publikoa ez desegiteko eta zerbitzu publiko hurbila, atsegina eta eraginkorra eraikitzeko». Funtsean, aldarri nagusia da osasun sistema eraldatzea eta «lehen mailako arreta eta prebentzioa erdigunean jarriko dituen osasun zerbitzua» garatzea.

Aldarri hori buruan, apirilaren 22an manifestazioak egingo dituzte Gasteizen, Bilbon eta Donostian. Horietan parte hartzeko deia egin dute.