Herri epaimahaiak aho batez hartu du erabakia: ebatzi dute gizon bat bere pisukidearen hilketaren erruduna dela. 2022ko urriaren 22an hil zuen pisukidea, Bilbon zuten pisuan. Herri epaimahaiaren erabakia oinarri, kasuaz arduratu den epaileak jarri dio zigorra: hamabi urte, sei hilabete eta egun bateko espetxe zigorra bete beharko du hilketagatik, berrerortzearen astungarriarekin eta alterazio psikikoaren aringarrairekin. Behin kartzelatik aterata, zaintzapean aske egongo da hamar urtean. Gainera, biktimaren sei anaietako bakoitzari 16.500 euroko kalte ordaina eman beharko dio. Alde guztiak ados daude zigorrarekin, eta, horrenbestez, ez dute helegiterik jarriko.
Bizkaiko probintzia auzitegian egindako lehen saioan bertan onartu zuen gizonezkoak pisukidea hil zuela. Zenbait aiztokada sartu zizkion, eta, ostean, etxetik alde egin zuen, biktima lurrean utzita. Handik hiru egunera hil zen, ospitalean. Gizonezkoa beste hilketa batengatik ere zigortu zuten aurrez.
