Sanchez: «Eskuinak ETAren mamua erabiltzen du ez duelako zer eskaini»

Gasteizen egon da Pedro Sanchez Espainiako Gobernuko presidentea, Maider Etxebarria eta Cristina Gonzalez PSE-EEko hautagaiei babesa emateko. Sozialistek Lakua auzoko pilotalekua aukeratu dute ekitaldia egiteko, eta militanteek lepo bete dute aretoa. «Haizea kontra izanda ere» sozialistek erdietsitako lorpen sozialak gogoratu ditu Sanchezek, eta ziurtzat jo du alderdi sozialista «indartu» egingo dela maiatzaren 28ko hauteskundeen ostean. «Ziur naiz lehen indarra izango garela, sozialistei botoa ematea ongizatea babestea baita», aldarrikatu du.

Hitza hartu eta berehala, Sanchezek geratu egin behar izan du, hainbat pertsona oihuka hasi baitzaizkio: Espainiako Gobernuak Mendebaldeko Sahararen inguruan hartutako jarrera salatu dute, eta «traidore» zioten afixak erakutsi. Segurtasun zaindariek atera egin dituzte, eta Sanchezek hitzaldiarekin jarraitu du ondoren, gertatutakoa aipatu gabe.

Sanchezek PPren aurka egiteko baliatu du hitzaldiaren zatirik handiena, eta eskuineko alderdiari aurpegiratu dio ETA erabiltzea Espainiako Gobernuaren lorpenak «estaltzeko»: «Eskuinak ETAren mamua erabiltzen du hauteskundeak galdutzat jotzen dituelako eta ez duelako zer eskaini. Baina badut berri txar bat haientzat: Espainiako demokraziak ETA garaitu zuen duela hamabi urte. Eta gobernu sozialista batek garaitu zuen ETA. Horixe da jasan ezin dutena».

Azpimarratu du PPk iragarritako «apokalipsia» ez dela inoiz iristen, besteak beste Espainiako ekonomia Europako batezbestekoaren gainetik hazten ari delako. Sozialistek irainen ordez «aurrerapen sozialak» eskaintzen dituztela azpimarratu ondotik, bi iragarpen egin ditu. Batetik, ahanztura onkologikoarekin lotuta iragarri zuen gaixotasuna gainditu dutenek ez dutela gidatzeko baimena hiru urtean behin berritu beharko. Bestetik, %45eko desgaitasuna edo handiagoa dutenek bost urte kotizatu beharko dute —eta ez hamabost– pentsioak aurrez eskuratzeko. Bi neurriok asteon hartuko ditu gobernuak.

Eneko Andueza PSE-EEko idazkari nagusiak ere parte hartu du mitinean, eta hark ziurtzat jo du PSE-EEk udal eta foru hauteskundeak irabaziko dituela, eta «giltza» izango direla. Anduezaren hitzetan, sozialistei esker lortu dira Osakidetza, eskola publikoa, diru sarrerak bermatzeko errenta eta Bilboko metroa martxan jartzea, besteak beste, eta horrek erakusten du «herritarren interesak» PSEk baino ez dituela defendatzen.

«Aldaketa lasaia»

Maider Etxebarria Gasteizko alkategaiaren ustetan, berriz, PSE-EEk «gurutzaldi abiadura» du, eta «geldiezina» izango da bozetan. Bere burua «aldaketa lasaiaren» ikurtzat jo du, eta, hitzaldi guztia gazteleraz egin ondotik, euskaraz esan ditu hitz hauek: «Aldaketa lasaia, inklusiboa eta erradikaltasunik gabea behar du Gasteizek. Nik hiri guztiaren alkate izan nahi dut. Hiriaren aniztasuna aintzat hartu nahi dut alkate gisa».
PSE kudeaketa onaren isla dela nabarmendu du Etxebarriak: «Soluzioak ematen dituen alderdia gara, EAJ, EH Bildu eta PP ez bezala. Herritarrek fronteen eta zubien artean aukeratu beharko dute. EH Bilduk eta PPk muturreko politikak dituzte, eta PSE da hori gelditzeko aukera bakarra».

Cristina Gonzalez ahaldungai nagusiak, bestalde, esan du sozialistek politika «eraginkorra» eta «erabilgarria» egiten dutela, eta boto emaile sozialistak mobilizatzera deitu zituen, orain arte lortutako «eskubideak» aurrerantzean ere defendatzeko.