Brandon McNultyk (UAE) irabazi du Italiako Giroko 15. etapa. Txirrindulariek hainbat mendate gainditu behar izan dituzte 195 kilometroko ibilbidean, eta gaur, atzo bezala, eguneko ihesaldia helmugara iritsi da. Zazpi minutu inguru atera dizkiete faboritoei. Ihesaldiko hiru indartsuenak McNulty, Ben Healy (Education First) eta Marco Frigo (Israel) izan dira, eta esprintean erabaki da garailea.
Bruno Armirail (FDJ) liderrak 30 segundo galdu ditu gainontzeko faboritoekiko, baina maglia rosa soinean duela irtengo da astearteko etapan. Atseden eguna izango dute bihar.
Eguneko ihesaldia hamazazpi lagunek osatu dute; tartean ziren Bauke Mollema (Trek), Einer Rubio (Movistar), Andrea Pasqualon (Bahrain)... baina, azkenean, hiru soilik heldu dira ihes eginda Bergamoko helmugara. Esprintean, beste biei aurrea hartu die Frigok, baina atzetik aurrerakoa egin du Healyk, eta haren gurpilari bikain heldu dio McNultyk, azken metroetan aurrea hartzeko. Bikain errematatu du egindako lana estatubatuarrak.
Faboritoen artean, berriz, mugimendu gutxi izan da. Joao Almeida (UAE) eta Primoz Roglic (Jumbo) izan dira saiatu diren bakarrak, baina ez dute arrakastarik izan.
