Lan Ikuskaritzak aldi baterako kontratua zuten 130 langileri behin betiko kontratuak egitera behartu du CAF. LAB sindikatuak salatu zuen langile horien egoera ikuskaritzan, apirilaren 25ean, eta arrazoia eman diote.
LABen ustez, CAF ekoizpenaren baldintzapeko behin-behineko kontratuen «iruzurrezko erabilera» egiten ari zen, kontratu horiek «guztiz aurreikusi daitezkeen lanak» egiteko zirelako. Gehienez 90 eguneko kontratuak izan daitezke horiek, baina CAFek urtebeteko behin-behineko kontratuak egiten zituela nabarmendu du sindikatuak.
Sindikatuaren arabera, enpresako giza baliabideetako arduradunekin saiatu ziren egoera konpontzen, baina, LABen ustez, enpresa egoera konpontzera «ukatu» zenez, Lan Ikuskaritzara jotzea erabaki zuten. 130 langile horiez gain, sindikatuak dio CAFen zuzendaritzak finko egin beharko dituela gainerako kontratu irregularrak dituzten langileak.
