Berpiztu egin da Roglic, eta itzali Almeida

Ahulaldia izan zuen Primoz Roglicek (Jumbo) asteartean, Bondonen gora. Joka hasi zitzaion alarma, eta zarata handitu egin da gaur, etapako lehen igoeran atzera eginda ibili denean. Mendiko beste saio gogor bat zuen Giroak, eta esloveniarra zalantzak hauspotzen ari zen. Haizatu egin ditu gero, ordea: erasora jo du amaieran, eta Giroa irabazteko beste bi hautagai handien pare dagoela erakutsi. Geraint Thomasek (Ineos) tinko eutsi dio Roglicen astinduari, eta, ondorioz, lasterketako lidergoari. Joao Almeida (UAE), aldiz, ez da Bondonen etapa irabazi zuen berbera izan, eta larri ibili da. 21 segundoko atzerapena izan du helmugan bi aurkariekin, eta hala, nagusiko bigarren postua kendu dio Roglicek. Jumbokoak 29 segundora du Thomas, eta 39ra Almeidak.

Oilarrak helmugaratu aurretik, iheslari saiatu batek altxatu ditu besoak Val di Zoldon: Flippo Zanak (Jayco). Lehia estua izan du Thibaut Pinotekin (Groupama), eta esprintean menperatu du frantziarra. Berriz ere kale egin du Pinotek; hori bai, bere egin du mendiko maillota, eta jauzi handia egin sailkapenean: zazpigarren jarri da.  

Mendi sorta ederra zuen etapak: bost igoera gainditu behar izan zituzten, azken hirurak oso segidan. Nolanahi ere, ordekarik ere bazegoen 161 kilometroko ibilbidean. Esaterako, lauak ziren aurreneko 30 kilometroak, lehen mailako Passo della Crosetta igotzen hasi aurretik. Asko izan dira malden zain egon gabe aurrera egiten saiatu direnak. Erasoari erasoa lotu diote iheslari-gaiek, eta elkar deuseztatu dute. Aldapan gora, baina, bost txirrindulari ipurtarin aitzineratu dira: Thibaut Pinot (Groupama), Aurelien Paret-Peintre (Ag2r), Derek Gee eta Marco Frigo (Israel), eta Filippo Zana (Jayco).

Gain-gainean zuten tropela gailurrean, Ineosek erritmo bizia ipini duelako. Baretu egin dira gero Thomasen zaindariak, eta bidea egiten utzi diote aurreko boskoteari. Zazpikote bihurtu da berandu gabe: atzetik aurrera egin dute Warren Barguilek (Arkea) eta Vadim Pronskiyk (Astana). Pinotek 6.48ko atzerapena zuen sailkapen nagusian, baina faboritoek ez dute mehatxutzat jo. Bidea eginez joan da ihesaldia, eta sei minutuko errentarekin iritsi da Forcella Cibianako igoerara, helmugarako 35 kilometroren faltan.

UAEko ziklistek saialdi herabea egin dute abiada bizitzeko. Azkenean, Ineosek egin du estutua, mendateko zatirik gogorrenean. Xehatua hartu du multzoak. Coi zen hurrengo mendatea, eta han egin du eztanda lasterketak, azken hamar kilometroetan sartuta. Ihesaldian, aurkari guztiak lehertu dituzte Pinotek eta Zanak; eta onenen artean, erasora jo du Jumbo Visma taldeak. Kussek soka tenkatu ahala, atzera egin du Almeidak. Distantziari ondo eutsi dio, Vineren laguntzaz.

Guztiz berpiztuta zegoen Roglic. Eraso egin du, baina ezin izan du Thomas gurpiletik askatu. Almeidak hamar segundo inguru zituen galduak mendate gainean. Ordea, bakarrik gelditu da azken igoeran, indarrez hustu delako Vine, eta tartea apur bat handitu dute Roglicek eta Thomasek. Dena den, alde txikiak izan dira berriro hautagai handien artean. Etapa garaipenaren lehia ere oso parekatua izan da: Pinotek ahaleginak eta bi egin ditu Zana atzean uzteko, baina oso sendo jardun du italiarrak, eta azkarragoa izan da azken ahaleginean.