Gipuzkoako egurgintzaren sektorean, hitzarmena berritu gabe ari dira langileak lanean 2003. urtetik, etasektorean gehiengoa duen sindikatuak, LABek, egoera hori amaiarazi nahi du. LABen arabera, 2009an egin zuten lan ituna berritzeko azken saiakera, baina Adegi patronalak alde bakarrez amaitu zituen negoziazioak, adostasunik gabe.
Hala, LABek dio ordezkariekin eta langileekin hitz egin duela sektorean zer behar dauden jakiteko, eta garbi dute ituna berritzeko gutxieneko neurri batzuk eskatuko dituztela. Izoztuta dauden soldatak azken urteetako KPIaren arabera eguneratu daitezela eskatuko dute, baita etorkizuneko soldata igoerak inflazioaren mailari lot daitezela ere. Bestalde, lanaldia murriztu nahi dute, eta aldi baterako ezintasunaren osagarriak lortu.
LABek adierazi du «datozen egunetan» erregistratuko duela negoziazio mahaia osatzeko deialdia.
