Goiena-k jakitera eman duenez, gaur zendu da Txema Abarrategi Garaigordobil (Aramaio, Araba, 1963-2023) euskaltzalea. Txirritola euskara elkartearen sustatzaile izandakoa zen, eta azken urteetan Garabide elkartean zebilen lanean, munduko hizkuntza gutxituen biziberritze prozesuak bultzatzen. Aurrez, Fagorren euskara sailean ibili zen beharrean.
Bertsogintzan ere jardundakoa zen, antolakuntza lanetan; politikan ere bai, zinegotzi eta Aramaioko Udaleko euskara batzordearen laguntzaile. BERRIAn ere idatzi izan zuen zutabe bat edo beste.
Haren semea da Peru Abarrategi, egungo Arabako bertsolari txapelduna. Sareetan hainbat izan dira Abarrategi gogoan izan dutenak.
Txirritola euskara elkartea sortzeko sasoia memoriara. 16 urte guk, bidelagun Txema, aitakeriarik gabe. Gerora, lagun minen guraso, ziri-sartzaile fin, adiskide. Bertso-saioa noiz hasiko, liburu bat beti eskuan, oroituko zaitut. Ez adiorik, Txema.
— Manex Agirre (@Manexagirre) August 20, 2023
https://t.co/BuJFYetXH3
Txema Abarrategi, umetan gure irakasle ikastolan eta euskalgintzako bidaide. Lurra arin bekizu #respect
— Eneko Barberena Mondragon (@Suak_nobela) August 20, 2023
