Europako Banku Zentrala hilabetez hilabete egiten ari den interes tasen igoera nabarmen eragiten ari da higiezinen merkatuan. Hipoteka bat kontratatzea inoiz baino garestiagoa da, eta zeharo moteldu da etxebizitzen salerosketa. 6.741 etxe saldu dira Hego Euskal Herrian apiriletik ekainera, urtarriletik martxora baino 994 gutxiago (7.735): %12,8ko jaitsiera da hori. Espainiako Jabetzaren Erregistratzaileen datuak dira.
Iazko datuekin alderatuta, nabarmen ikusten da interes tasen igoerek zenbateko eragina izan duten. 2022ko lehen hiruhilekoan 8.224 etxebizitza saldu ziren, eta bigarrenean, berriz, 7.928.
Apiriletik ekainera bitartean saldutako etxeetatik 1.354 berriak ziren, eta 5.387, berriz, bigarren eskukoak. Nabarmentzekoa da Nafarroan etxebizitza berrien salmentek zenbateko pisua izan duten; izan ere, Hego Euskal Herrian salmenten %20 izan dira etxe berriak, eta Nafarroan, berriz, %40,5.
Metro koadro bakoitzaren prezioa ere asko garestitu da joan den urtetik hona. Gipuzkoa da oraindik ere metro karratua garestiena den lurraldea: 3.423 euro metro koadroko. Iazko epe berean, 3.208 eurokoa zen prezioa. Bizkaia da bigarren zerrendan. Iazko bigarren hiruhilekoan, metro koadro bakoitzak 2.746 euro balio zuen batez beste, eta aurten, berriz, 2.815.
Araban 1.964 eurotik 2.220 eurora garestitu da metro koadroaren prezioa urtebetean, eta Nafarroan, berriz, 1.773 eurotik 2.280 eurora.
