Donostia Kultur Hiriburu izendatu zutenetik hiru urte beteko dira hurrengo larunbatean, eta, hori ospatzeko asmoz, Donostia 2016ren egoitza herritarrei zabalduko dietela azaldu du Xabi Paya kultur hiriburutzako zuzendaritzako kideak: "Lehenago ere egin ditugu ekimen batzuk hemen, baina, hurrengo larunbatetik aurrera, Donostia 2016 ikusaraziko duen gune nagusia izango da". Goizean eman dute prentsaurrekoa, Eason duten egoitzan.
Zehaztu du, hala ere, hilaren 28koa ez dela izango egoitzaren inaugurazio ofiziala, oraindik eraikineko lanak guztiz amaitu gabe daudelako. Ekitaldi ofiziala urrian egitea espero dute. "Kultur hiriburutza izendapena izan duten gainerako hirietako ordezkariak etorriko dira", gaineratu du Payak.
Agurtzane Intxaurraga antzerki zuzendaria arduratu da Artejira antolatzeaz. Bakoitzak "orekaren inguruan duen ikuspuntua" lantzen ahalegindu dela azaldu du: "Hizkuntzen, sentimenduen, generoaren eta kulturen arteko orekak landu izan nahi ditut". Jaialdia prestatzeko, kultur etxeetako koordinatzaileak izan ditu lagun Intxaurragak. 50etik gora artista profesionalen ekimenak ere izango ditu Artejira jaialdiak, tartean, Jabier Muguruza abeslariarena.
