Joan den igandean itzuli zen Lurrera Crew Dragon kapsula, Doug Hurley eta Bob Behnken astronautak ISS Nazioarteko Espazio Estazioan 62 egun egon ondoren. Misioak beste aro bat ireki dezake espaziorako bidaietan. Izan ere, NASAk bederatzi urte zeramatzan espaziora astronautarik bidali gabe; denbora horretan, Errusia behar izan du espaziora astronautak bidaltzeko.
Robert Behnken (ezkerrean) eta Douglas Hurley (eskuinean) astronautak 'Crew Dragon' kapsulan eserita, Lurrera iristean. Bill Ingalls HANDOUT / EFE
Misio horretan, NASAk egiaztatu du Space Exploration Technologies (SpaceX) konpainia komertzialak baduela gaitasuna duela jendea espaziora bidaltzeko —konpainia horren suzirian jaurti zuten Crew Dragon kapsula—, eta horrek beste aro bat ireki dezake espaziorako bidaietan. Alberto Santiesteban Europako Espazio Agentziako industria laguntzaile bateko ingeniari aeroespazialak azaldu duenez, misio horrekin AEBek «autoestimua berreskuratu, bere industria aeronautikoa sustatu, eta atea ireki diote elkarlan pribatuaren aro berri bati».
Kapsula Nazioarteko Espazio Estaziora egokitu zen unea. NASA TV HANDOUT / EFE
Kapsula Falcon 9 espazio suzirian jaurti zuten, maiatzaren 30ean, Cañaveral lurmuturretik (Florida, AEB). Astronautak biharamunean iritsi ziren Nazioarteko Espazio Estaziora, eta, bertan, zenbait ikerketa tekniko eta zientifiko egiten aritu ziren 62 egunez. Lurrari 1.024 bira eman zizkioten. Abuztuaren 2an itzuli ziren Crew Dragon kapsulan Lurrera, eta, 20:48an, Mexikoko golkoan itsasoratu ziren.
This is the first time in human history @NASA_Astronauts have entered the @Space_Station from a commercially-made spacecraft. @AstroBehnken and @Astro_Doug have finally arrived to the orbiting laboratory in @SpaceX's Dragon Endeavour spacecraft. pic.twitter.com/3t9Ogtpik4
— NASA (@NASA) May 31, 2020
Hurrengo jaurtiketa abuztuaren 30ean egitekoak dira; NASAren berezko misioak hasiko dira orduan.
