Abenduaren 28an etorri da, Hego Euskal Herrian txantxak egiteko egunean. Amazon Prime plataformaren Eraztunen jauna telesaila euskaraz bikoiztuta ikus daiteke —The Lord Of The Rings: The Rings Of Power, jatorrizko izenean—. Inoiz egin den telesailik garestiena da J. R. R. Tolkienen liburuetan oinarritutako fantasiazko istorioa. Irailaren 2an estreinatu zuten, 30 hizkuntza baino gehiagotara bikoiztuta —besteak beste, katalanera eta galegora—. Amazonek orduan adierazi zuen euskarazko bikoizketa ez zegoela prest, eta «egun batzuk barru» aterako zirela lehenbiziko atalak. Telesaila urrian bukatu zen, ordea, euskarazko bikoizketarik gabe. Azpidatziak, baina, lehenbiziko egunetik izan dira eskuragai.
Atzerapen horrek zeresan handia eman du hilabete hauetan superprodukzio hori euskarazko audioarekin gozatzeko prest zeudenen artean, eta ezinegona ere sortu du, Amazon Primek ez baitu azalpen argirik eman.
Hain zuzen, plataformetako euskarazko edukien katalogoa egiten duen Zer Non Ikusi taldeak txantxa batekin hasi du abenduaren 28a, goizean Twitter sare sozialean idatzi baitu bikoiztutako atalak sarean zeudela, hiru hilabeteko itxaronaldiaren ondotik, baina mezuari atxiki dion lotura batek Mr. Bean pertsonaiaren irudira zeraman. Iluntzean, ordea, ohartarazi du oraingoan benetan ari zela, bikoiztutako atalak Amazon Primen zeudela.
[Estreinaldia] Lehenago galdetu izan bagenu, lehenago igoko lukete. Azkenean hemen da "Eraztunen Jauna: Botere eraztunak" telesailaren euskal bikoizketa! Gozatu telesail bikain hau euskaraz bikoiztua! Hona hemen bere fitxa: https://t.co/Nk8XzsCZwi#pantailakeuskarazpic.twitter.com/mnIM9LgNUd
— ZerNonIkusi (@ZerNonIkusi) December 28, 2022
[ESTREINALDIA] Ba txantxa moduan hasi da baina gaur jarri dute euskal bikoizketa!!!!!! Kasualitatea? ðŸ¤Â”Orain bai, gozatu telesail hau euskal bikoizketarekin! Webgunea eguneratuko dugu Mr. Bean kentzeko 🤣 pic.twitter.com/cIVvbJCgZ7
— ZerNonIkusi (@ZerNonIkusi) December 28, 2022
