Gaur egun Euskal Herrian aiton-amon ugari ikusten dira bilobekin, kalean, ikastetxeetako atarietan eta kirol guneetan. Gurasoak lanean daudenean, funtsezkoa izaten da familia askotan aiton-amonen laguntza. Bilobekin duten harremanaz eta familietan dagoen egoeraz mintzatu dira Luis Egiluz, Nati Iñarra eta Josema Lizarralde. Hirurak bilobak zaintzen aritzen dira, tarteka.
Bizigiro gehigarrian, beste hainbat gai izango dira bihar irakurgai: Gasteizko San Prudentzio Egunaren kronika egingo dute. Igandera begira jarriko dira, era berean, eta Nafarroaren Egunaren nondik norakoak azalduko dituzte —Baigorrin egingo dute—. Asteburuko proposamenen artean, Burgiko (Nafarroa) Almadien Egunaren berri emango dute. Eta, elikadurari eskainitako tartean, Iruñeko Baseberri jatetxeari buruzko erreportajea argitaratuko dute.
